Subtítulo corpo 16 para noticias principais a tres columnas
11 may 2021 . Actualizado ás 05:00 h.O núcleo da Caeira, no municipio de Poio , estreou xa o novo viario que comunica as rúas Río Sil e Río Umia, e que está dotado «con todos os servizos necesarios». Desde o Concello engadiron que se trata dunha rúa de sentido único e que está plenamente operativa tras a finalización dos traballos realizados pola empresa adxudicataria, EC Casas.
A titular do departamento de Obras e Servizos, a socialista Chelo Bicada, lembrou que os traballos comezaron no principio do ano «logo de que o Concello se vira na obriga de volver a sacar a licitación o proxecto, debido ao cese de actividade repentino da empresa Nexia Infraestruturas». Esta continxencia determinou que se tivese que reiniciar a tramitación de diferentes actuacións que esta firma non chegou a executar no municipio.
Cun orzamento de algo máis de 72.000 euros, o novo viario discorre ao longo de algo máis dun centenar de metros e dispón do «equipamento necesario para garantir a seguridade peonil, ao dispor de novas beirarrúas de 2,5 metros de ancho». De igual modo, habilitáronse unha quincena de prazas de estacionamento para vehículos, ademais de que dispón das «pertinentes redes de abastecemento, saneamento e telecomunicacións, así como con mobiliario urbano e novas luminarias».
Chelo Bicada destacou que as obras levadas a cabo «serven para dar vida a unha nova rúa que prestará un servizo moi importante aos veciños, ao ser unha zona de moito tránsito de peóns, e que tamén permitirá axilizar o tráfico rodado».