A sorte sorriu onte ao Poio Pescamar e o que lle quitou hai unha semana contra o Ourense Envialia devolveullo onte contra o Móstoles no último minuto do xogo. A escuadra rojilla apuntouse a vitoria (2-1) onte en casa nun partido axustado que se resolveu cun tanto Andrea Feijoo no tramo final.
O Móstoles foi mellor no primeiro acto, levando o peso do partido e pondo as ocasións en ataque. Así, o club do sur de Madrid púxose por diante no marcador no ecuador da primeira parte grazas a unha diana de Alicia Benete na que lle gañou as costas á zaga local.
As xogadoras que adestra Raúl Jiménez espertaron tras o paso por vestiarios e a actitude na segunda parte foi moi distinta. Cárol Agulla devolveu as táboas no marcador á media hora de xogo tras unha boa xogada na que conseguiu darse a volta dentro da área para bater a Silvia.
Co partido convertido nun correcalles no que a vitoria podía caer para calquera das dúas partes, Andrea Feijoo fixo o definitivo tanto da vitoria conserveira nun contragolpe cando restaba pouco menos dun minuto para acabar o partido.