A Coordinadora Anti-Encoro acudirá á Fiscalía se non se actúa para salvar o río Umia

Tras varios anos de silencio, a Coordinadora Anti-Encoro de Caldas de Reis, Cuntis e Moraña reapareceu este venres ante a preocupante situación da presa da Baxe e do río Umia pola proliferación de cianobacterias. O colectivo veciñal, que se reuniu este xoves, acordou que, se non se actúa, solicitará a intervención da Fiscalía para dirimir posibles responsabilidades penais polo abandono de funcións por parte dos cargos públicos. Ao seu entender, está a pórse en perigo á poboación e condenando ao medio natural que «teñen a obriga de protexer».

A coordinadora sostén o que xa dixo fai moitos anos, que a eliminación da cianobacteria e a recuperación da canle só se poden conseguir desmantelando o encoro. Ademais apunta que existe a posibilidade legal de rescatar a concesión por causa de saúde pública. Por todo iso, a asociación esixe a todas as autoridades, tanto municipais como autonómicas, que adopten «as medidas precisas para deixar o río libre, permitindo así os seus usos de abastecemento de auga limpa e de lecer».

O colectivo veciñal subliña que o estado «tóxico» do río é resultado da «deixación», «desidia» e «irresponsabilidade» de todas as autoridades que teñen que velar pola seguridade das persoas, así como pola conservación do medio natural. Lembrou que o 1 de outubro do 2006, o pleno do Concello de Caldas -cos votos a favor de BNG e PSOE e a abstención do PP-, acordara dirixirse á presidencia da Xunta instando xa o desmantelamento do encoro por representar un perigo para a saúde e seguridade das persoas. Naquel ano, tras o incendio de Brenntag, detectouse por primeira vez a cianobacteria Microcystis, a causante da alerta na presa.

A coordinadora non desaproveitou a ocasión para sentenciar que o encoro da Baxe é «un dos máis graves casos de corrupción do noso país», disfrazando -asegurou- un negocio privado como de utilidade pública e utilizando fondos públicos e antidisturbios para desposuír aos lexítimos propietarios das súas terras. Todo para converter «un río vivo nun pantano putrefacto por intereses económicos».

Solicitan que a auga se trate xa con ozono

Por segunda vez nunha semana, cargos do BNG compareceron este venres para esixir á Xunta garantías sobre a auga de consumo das comarcas de Caldas e O Salnés. Se o martes o fixeron no muro do encoro do Umia, onte elixiron o dique da carballeira. A deputada Montse Prado e concelleiros en varios concellos afirmaron que a proliferación da alga tóxica está a afectar xa ao proceso de depuración da auga. No caso de Caldas, o portavoz nacionalista, Manuel Fariña, reclamou ao Concello que aplique o tratamento con ozono existente na ETAP, ao entender que é necesario para servir unha auga de calidade que non saiba a cloro. O BNG de Caldas saltábase así a estratexia de consenso do gabinete de crise creado o mércores por todos os grupos municipais.

Pola súa banda, a parlamentaria fixo fincapé en que as depuradoras situadas augas abaixo de Caldas non dispoñen de filtros de carbón activo, senón que se realiza unha simple cloración. «Preguntámonos se a Xunta pode asegurar que a auga que chega ás billas dos fogares de máis de 150.000 persoas está en condicións», subliñou Prado, que anunciou unha campaña de sensibilización e información aos veciños.

---

---

---