Traballadores dos nove PAC da área sanitaria de Pontevedra saen á rúa polo exceso de xornada
MARÍN
Piden á dirección unha solución conxunta á falta de médicos
16 oct 2021 . Actualizado ás 05:00 h.Das queixas internas ás protestas na rúa. É o que farán o vindeiro luns, 18 de outubro, traballadores das urxencias extrahospitalarias da área sanitaria de Pontevedra e O Salnés. Médicos e enfermeiros dos nove puntos de atención continuada (PAC) do territorio -A Parda-Pontevedra, Vilagarcía, Marín, Baltar-Sanxenxo, Bueu, Caldas de Reis, O Grove, Cambados e Cerdedo- teñen previsto concentrarse ás 11 horas nas escaleiras do Hospital Provincial.
Mobilízanse para dar a coñecer a situación que están a vivir desde hai semanas e que afecta, de momento, ao colectivo de facultativos. Os médicos teñen que facer gardas a maiores obrigatorias ante a falta de persoal. Unha extensión da xornada ordinaria que é legal, pero que se está aplicando, din os afectados, sen diálogo e a golpe de fax, o que está a levar «ao límite» aos profesionais tras un verán onde non houbo reforzos.
Segundo explicou onte a enfermeira do PAC de Caldas e portavoz dos traballadores, María Torre Almón, a decisión de concentrarse débese á negativa do equipo directivo da área de saúde a recibir aos nove representantes de xeito conxunto. «O 23 de setembro enviouse esa petición de entrevista conxunta, pero a resposta da dirección a semana pasada é que as reunións serán individuais, só con cada representante de cada PAC e a dirección médica», sinalou.
Os traballadores defenden que o problema que atravesan as urxencias extrahospitalarias é conxunto e que por iso a solución débese abordar de forma global. Xa que logo, piden sentarse a unha mesa con todo o equipo directivo da área (xerente, directora asistencial, directora de atención primaria e de recursos humanos).
Repartición equitativa
«Sabemos que o cambio que estende a xornada e esas obrigatoriedades están no acordo. Recóllese así, pero creemos que o procedemento non é o correcto. É unha cuestión importante que afecta ao día a día e hai que falala cos traballadores e levala á comisión de centro para que a repartición sexa o máis equitativo», indicou María Torre Almón. Tras esa solicitude de reunión do 23 de setembro, asinada polo colectivo de médicos, a resposta da dirección, comunicada o 6 de outubro, foi que cada PAC nomease un representante xunto ao coordinador do servizo para manter reunións individuais. «Os problemas non son individuais, nin sequera de cada PAC», insiste a portavoz dos traballadores. Os profesionais das urxencias extrahospitalarias acordaron esta semana que non acudirán a esas reunións coa dirección se son individuais.
Este venres si se celebrou un encontro entre persoal do PAC de Vilagarcía coa dirección porque se solicitou antes do acordo adoptado polos traballadores. Desde a Xerencia non se quixo facer ningunha valoración do tratado: «A reunión é interna e non se van a facer comentarios».