O mozo, natural de Moaña e de 27 anos, estaba sen permiso de circulación ata xaneiro do 2020
25 jul 2019 . Actualizado ás 20:04 h.A Policía Local de Marín levaba a cabo unha campaña para protexer aos colectivos máis vulnerables na estrada, en especial aos ciclistas. No marco desa acción e dentro dun control que se realizaba este xoves, ás 8 horas na avenida de Ourense, os axentes municipais observaron a un vehículo que circulaba a velocidade elevada en sentido Pontevedra. O turismo adiantaba a outro e a un grupo de ciclistas que circulaban correctamente.
Os policías déronlle o alto e observaron pola súa conduta que podería ter consumido algún tipo de sustancia estupefaciente. Ao someter ao condutor, natural de Moaña e de 27 anos, ás probas de drogas confirmouse un positivo en cocaína. Pero non foi todo. Ao comprobar a documentación os gardas tamén descubriron que o mozo conducía co carné retirado desde o pasado xaneiro. O historial do raparigo é de película. Segundo relata a Policía Local de Marín, retiráraselle xudicialmente o permiso de conducir no ano 2013. Tivo que realizar por iso un curso de sensibilización e reeducación e puido recuperar o carné. Con todo, no 2016 volveuno perder ao quedar sen puntos. Viuse obrigado a realizar un novo curso de recuperación de puntos, aínda que o pasado xaneiro volveu perder os puntos, estando co permiso retirado ata xaneiro do 2020.
O condutor tense que presentar nos xulgados de Marín o próximo 31 de xullo como investigado por un presunto delito contra a seguridade viaria. A policía tramitou un atestado por conducir vehículos a motor con perda de vixencia do permiso ao non ter puntos asignados legalmente, ademais dunha denuncia administrativa por conducir tras ter inxerido drogas.