De peregrinaxe pola comarca para que ao neno o vexa un pediatra
CUNTIS
É a pixota que eternamente se morde a cola: os concellos rurais baléiranse de nenos e os servizos van a menos. Ou ao revés, os servizos escasean e os nenos e as súas familias acaban índose cara ás cidades. O peliagudo tema dos pediatras é un bo exemplo de todo iso. Ata que non se produciu o concurso de traslados do Sergas e a reestruturación das consultas o servizo estaba máis ou menos adecuado ás necesidades. Ou, polo menos, pais e concellos conformábanse coas horas de atención pediátrica que tiñan -nalgúns municipios só contaban co especialista una ou dúas medias mañás á semana-. Pero desde que se produciron todos eses cambios o patio anda revolto.
Os pais non deixan de evidenciar a súa chea por ter que peregrinar dun municipio a outro para levar aos seus fillos ao médico. Os proxenitores e políticos de Cuntis levan a palma nas protestas; onte volveron concentrarse ante o centro de saúde. E é que Cuntis e Moraña están sen pediatra desde que a facultativa que compartían acolleuse ao concurso de traslados. Teñen que viaxar ata Caldas.
Campo Lameiro tamén quedou sen atención no seu municipio. Os pais poden ir a Lérez ou a Tenorio. O alcalde di que non lle gusta a situación, pero entende que o Sergas non conta con profesionais para enviar un ata o termo. Cotobade tamén saíu mal parado cos cambios. Antes tiña consulta pediátrica en Carballedo e Tenorio e agora só hai médico para nenos en Tenorio.
Desde o Sergas sinalan que se trata dun problema de carácter nacional, xa que non hai pediatras dispoñibles en toda España. O xerente da EOXI acudiu a varios municipios a falar con pais e políticos.