Condenado o empresario Juan José Caamaño por agredir ao portavoz do BNG de Caldas
CALDAS DE REIS
Terá que pagar unha multa de 270 euros por un delito leve de lesións e indemnizar a Manuel Fariña con 985 euros
20 jul 2021 . Actualizado ás 14:58 h.Unha sentenza do Xulgado de Primaria Instancia e Instrución número 1 de Caldas de Reis condena ao empresario Juan José Caamaño Iglesias por un delito leve de lesións que sufriu o portavoz municipal do BNG de Caldas, Manuel Fariña Souto. A resolución coñecida este martes, pero de data 29 de xuño, impón ao acusado unha multa de 270 euros e unha indemnización de 985 euros ao concelleiro, ademais de asumir o pagamento das costas procesuais. Contra a sentenza cabe recurso de apelación. Os feitos probados que recolle o fallo ocorreron o 5 de marzo do 2020 nunha parcela forestal do lugar de Cardín, na parroquia de Saiar. Manuel Fariña denunciara previamente e de forma pública a existencia dunhas verteduras ilegais.
A sentenza recolle que aquel día, sobre as 11.40 horas, o denunciante, a petición do empresario, acompañouno ata os terreos de Cardín. Unha vez alí e, tras unha discusión, Juan José Caamaño, «con ánimo de atentar contra a integridade física de Manuel», dirixiulle o puño á cara, o que provocou a súa caída. O concelleiro, no chan, díxolle: «Paréceche esta a forma de amañar as cousas?», ao que o empresario respondeu: «Douche unha e douche vinte, porque as mereces e porque teño huevos para darchas e porque eres un fillo de puta». Como consecuencia da agresión, Manuel Fariña sufriu unha contusión no nocello esquerdo, outra no queixo e outra na nádega esquerda. Tardou 21 días en curar.
Inicialmente, a defensa de Manuel Fariña pretendía que se xulgasen os feitos como un delito de atentado e non como un leve de lesións, como finalmente foi. O xuízo tivo lugar o 15 de xuño. Nos fundamentos de dereito da sentenza, o xuíz considera que as lesións se produciron á marxe da actividade propia de concelleira. «Non se atopaba nunha visita pública nin exercía a súa condición como tal durante esta ningún tipo de acto público nin semellante. Tampouco se atopaba exercendo unha función pública encomendada ou en representación da corporación municipal», dise na resolución.
O portavoz do BNG de Caldas expresou a súa satisfacción pola condena do empresario. No entanto, Manuel Fariña afirmou que o máis triste é que máis dun ano despois os residuos continúan no mesmo lugar sen que ninguén se preocupase de retiralos. «É indecente o desprezo dalgunha persoa polo medio ambiente, pero tamén o é a deixadez absoluta das Administracións que teñen que velar porque o noso medio natural estea nas mellores condicións posibles», afirmou. O concelleiro reiterou que continuará defendendo o interese público, o monte e o medio ambiente de Caldas.