O instituto de Caldas aposta pola construción dun novo edificio ao entender que aumentando a altura do actual non se disporía de instalacións adecuadas para impartir FP
12 feb 2021 . Actualizado ás 17:25 h.O IES Plurilingüe Aquis Celenis de Caldas de Reis sae ao paso do cruzamento de acusacións entre o goberno local e a oposición ao fío dos trámites para a ampliación do instituto. O equipo directivo afirma que o centro, o único da zona escolar con oferta de educación posobligatoria, carece de espazo suficiente para atender todas as necesidades do alumnado. Fai fincapé en que fai cinco anos a dirección intentou xestionar unha ampliación que permitise mellorar a actual oferta para poder impartir FP Básica e módulos. Segundo a súa versión, comprendeuna esa necesidade e elaborou unha proposta de ampliación consistente en aumentar unha altura ao edificio actual. No entanto, no curso 2018/2019 a Consellería modificou ese proxecto inicial e aprobou a ampliación do instituto coa construción dun novo edificio anexo nun terreo lindeiro, destinando orzamento para ese fin.
O equipo directivo do IES Aquis Celenis alude a que durante ese proceso compartiu as súas inquietudes co alcalde de Caldas, Juan Manuel Rey (PSOE), que manifestou sempre o seu apoio ao proxecto. «Unha vez aprobado o proxecto de ampliación foi cando directamente dende a Consellería se lle solicitou á alcaldía que cedese os terreos do lado leste», sinala. Desde o instituto recálcase que dous anos despois segue á espera de que o Concello ceda eses terreos. «Recibimos a noticia de que se baralla desbotar a construción do edificio anexo e se retoma o proxecto da Xefatura Territorial de ampliar en altura. Dende o noso punto de vista, esta solución resolvería os problemas de espazo no centro, pero non permitiría dispoñer de instalacións adecuadas para ofertar ciclos formativos», subliña. Reitera que a ampliación do instituto é de interese para toda a poboación de Caldas e da comarca e por iso, aínda que é positivo que estea na actualidade do debate político, o obxectivo «ten que ser colaborar para conseguir o máis axiña posible unha solución satisfactoria».