O instituto de Caldas afirma que o galardón reforza o seu proxecto educativo
01 feb 2021 . Actualizado ás 20:54 h.O IES Plurilingüe Aquis Celenis de Caldas de Reis acaba de resultar gañador na primeira convocatoria dos premios Innovagal. Trátase duns galardóns que concede a Consellería de Educación para recoñecer o labor dos centros que destacan pola súa traxectoria de compromiso coa innovación educativa. En concreto, o centro recibiu o primeiro premio e tamén unha mención de honra, que recoñece a posta en práctica de estratexias innovadoras de adaptación da actividade lectiva ao escenario non presencial derivado das circunstancias do confinamento durante o pasado curso 2019/2020. «Este premio ilusiónanos especialmente porque reforza o noso proxecto educativo», sinalou este luns a dirección do instituto. Fan fincapé en que levan anos introducindo metodoloxías innovadoras como traballo cooperativo, atención á diversidade ou tratamento integrado de linguas, ademais de participando en múltiples programas de innovación educativa. Tamén subliñan que o instituto se envorcou na integración didáctica das TIC mediante o uso xeneralizado da aula virtual e a participación nos programas de Aulas Abalar (elaboración de contidos dixitais) e Edixgal (libro dixital).
O equipo directivo do Aquis Celenis afirma que o seu proxecto se fundamenta en que o centro escolar, como parte esencial da vila e da comarca, debe ser permeable ás necesidades reais da súa poboación. Nesa liña queren continuar nos próximos, nos que a súa meta máis inmediata é a implantación de ciclos formativos. Un camiño que, din, está avanzado xa que a Consellería de Educación ten o orzamento destinado e o compromiso de execución do proxecto axiña que dispoña dos terreos por parte do Concello de Caldas. «Aínda que os trámites por parte do Concello xa levan máis dun ano de retraso, contamos co interese do alcalde e confiamos en que este diñeiro destinado pola consellería poida empezar a verse concretado este mesmo ano nos cimentos dun novo edificio que permita albergar os módulos de FP para ofrecer unha nova oportunidade de formación á mocidade de Caldas», apuntan.