PortAmérica, finalista como máis sostible nos European Festival Awards
CALDAS DE REIS
O festival de Caldas está nomeado xunto a outras cinco citas de dimensión internacional
12 dic 2019 . Actualizado ás 18:40 h.Os European Festival Awards seleccionaron a oitava edición do PortAmérica como finalista na categoría de festival máis sostible (Green Operations Award). Desde Esmerarte Industrias Creativas, a produtora do PortAmérica, sinalaron que estes galardóns, en cuxa undécima edición votaron 350.000 persoas, son o certame «con máis peso a nivel continental na industria».
A organización do PortAmérica, que se celebra en Caldas de Reis desde fai tres anos, mantén unha aposta cada vez máis ambiciosa polo respecto á natureza. Iso valeulle este nomeamento, que comparte con outros cinco festivais de dimensión internacional fincados en Noruega , Dinamarca, Suíza, Francia e Romanía. Os festivais PortAmérica e Primavera Sound son os únicos representantes de España na gala que terá lugar o próximo 15 de xaneiro na cidade holandesa de Groningen.
En que se basea o nomeamento do PortAmérica como festival máis sostible? Sobre todo en dúas propostas, a xornada de reforestación Unha entrada, unha árbore, e o vaso sementeiro Estrella Galicia. No entanto, destácase que o esforzo e o traballo por conseguir un evento respectuoso coa natureza é transversal e ten o seu impacto en todas as dimensións do festival, tal e como se recolle no informe de sustentabilidade 2019.