O festival de Caldas e Hifas dá Terra fomentarán o desenvolvemento e a produción de cogomelos no rural con máis de mil plantas de piñeiro micorrizado
07 novs 2019 . Actualizado ás 19:09 h.As empresas Esmerarte/PortAmérica, Hifas Foresta e Hifas Foundation, en colaboración coa Consellería de Medio Rural e a Mancomunidade de Montes do Saiar, impulsan unha nova reforestación nos montes de Saiar, en Caldas de Reis, mañá venres, 8 de novembro, a partir das 10.30 horas.
A colaboración entre ambas as empresas xorde no marco do Festival PortAmérica, unha iniciativa de Esmerarte que vén de celebrar a súa edición máis sostible. Nesta oitava cita coa mellor música e gastronomía de ambos os lados do Atlántico, Hifas promoveu o taller infantil Cultiva a ciencia dos cogomelos, e agora a alianza culmina con esta iniciativa que dotará aos montes de Saiar de máis de mil plantas de piñeiro micorrizado.
Esta será a segunda reforestación nos montes de Saiar tras a plantación de 2.500 pés de castiñeiros, cerdeiras, bidueiros e carballos o pasado xaneiro na xornada Unha entrada, unha árbore, que terá lugar de novo no 2020, e que naceu co obxectivo de concienciar á poboación de que cando arde o noso monte, tamén o fai unha parte de nós.
Os piñeiros micorrizados caracterízanse, sinalan desde Esmerarte, por presentar nas súas raíces nutridoras unhas formacións filamentosas e coloreadas que as recubren parcialmente e que corresponden cunha asociación simbiótica formada entre un ou varios fungos e a propia raíz da planta, dando lugar a un novo órgano: a micorriza.
Esta simbiose do fungo coa raíz dáse en moitos casos de forma natural, pero tamén podemos conseguir este fenómeno artificialmente, inoculando o fungo desexado no sistema radical, o que denominamos micorrización. A micorrización, como proceso fisiológico, é un traballo en equipo que ten por finalidade a axuda que se prestan mutuamente estes dous seres vivos: a planta e o fungo, nun medio que é o chan.
Neste intercambio de axuda, a planta recibe do fungo diversas sustancias nutritivas que este lle facilita por ser capaz de acadar cos seus hifas lugares do chan onde existen reservas de auga ou de elementos minerais que a raíz non acada a captar por si soa. O fungo, ao mesmo tempo que axuda a alimentar a planta, protexe á raíz do ataque doutros axentes patógenos mediante a emisión de sustancias antibióticas que paralizan a outros fungos, a bacterias ou mesmo a certos insectos aos que tamén dificultan a entrada coa súa protección física mediante o manto de micelio creado a modo dunha delicada luva.
Esta simbiose permite á planta vivir en lugares con problemas de toxicidade nos chans, escaseza ou exceso de auga ou onde os elementos minerais son pouco abundantes ou non asimilables para satisfacer as súas necesidades.
Neste traballo en equipo o fungo recibe da planta o seu alimento en forma de hidratos de carbono (azucres). Estas sustancias son elaboradas pola planta nas súas follas mediante a función clorofílica e chegan á raíz, onde está o fungo, para a súa nutrición e desenvolvemento.
Unha vez plantados, e co transcurso duns poucos anos, os terreos onde se plantaron estas especies son produtores de cogomelos comestibles en cantidades moi interesantes que nos achegarán un importante recurso de alta calidade e totalmente ecolóxico.