Opositores ao encoro do Umia cuestionan o investimento no bosque de ribeira

A Coordinadora Anti-Encoro de Caldas de Reis, Cuntis e Moraña cuestiona o novo investimento no Umia para a recuperación do bosque de ribeira anunciada pola Xunta e que ascende a algo máis de 100.000 euros. O colectivo veciñal denuncia que se sigan «metendo nun pozo sen fondo cantidades inxentes de cartos públicos que innecesariamente se están gastando por culpa do encoro». Lamenta que a política da Xunta consiga que unha parte da poboación entenda como boa un investimento millonario que, ao seu entender, non sería necesaria se non se autorizase a explotación hidroeléctrica da presa da Baxe.

Os opositores ao encoro tamén se refiren á eutrofización que mantén en estado de alerta por cianobacterias ao encoro desde o pasado xuño. Neste sentido, afirman que é falso que os problemas de eutrofización do Umia débanse á gandería ou á falta de instalacións de depuración. «O Umia era un río cunha calidade de auga boa ou moi boa e non tivo nunca problemas antes do encoro, agás verquidos puntuais», subliñan. Engaden que a eutrofización ten a súa orixe na auga estancada que resulta necesaria para que exista a explotación hidroeléctrica. Insisten en que sobre a solución para a desaparición definitiva da alga Microcystis xa se pronunciou a comunidade científica: «Deixar o río libre sen atrancos artificiais que reteñan a auga, conseguindo así que se osixene e impedindo, en consecuencia, a eutrofización que dá lugar ás cianobacterias».

A Coordinadora aproveitou para facer un chamamento á reflexión cidadá e para que se pregunte por que deben asumir estes riscos e prexuízos «só para que unha mercantil explote o río, coa complicidade da Xunta e mesmo das autoridades locais». Asegura que no encoro do Umia investíronse desde 1996 máis de catro mil millóns de pesetas. Tamén insta o alcalde de Caldas, Juan Manuel Rey (PSOE), a que asuma «dunha vez a responsabilidade que ten de defender o seu río e a saúde e benestar dos veciños de Caldas».

---

---

---