Caldas presentará en breve un avance da consulta veciñal sobre os usos de Segade
CALDAS DE REIS
O Concello de Caldas de Reis e un equipo multidisciplinar vinculado á Universidade teñen previsto presentar nuns días un avance do resultado da consulta veciñal para definir un plan de usos da contorna da fervenza de Segade, na parroquia de San Andrés de César. Esta iniciativa deuse a coñecer o pasado 26 de marzo e púxose en marcha a primeiros de abril.
O proxecto, que coordina a alcaldía, conta coa participación dun equipo multidisciplinar de profesionais para a súa execución. O plan de traballo anunciado no seu día incluía consultas aos diferentes grupos sociais desde principios de abril. O equipo técnico especializado tiña previsto realizar visitas e entrevistas aos habitantes do municipio, de forma individual e colectiva. O seguinte paso sería a convocatoria dun taller conxunto para buscar un punto de encontro sobre a estratexia a seguir. E o último elo sería a creación dunha mesa de expertos.
O que busca este proxecto é deseñar un plan reitor para dinamizar o complexo turístico-patrimonial e de lecer da fervenza de Segade, o encoro da Baxe e os seus perímetros. Con este proceso perséguese, segundo sinala o goberno local, «que responda fielmente ás expectativas dos seus veciños ademais de reforzar o valor patrimonial e natural que este contorno merece». Quérese dar á cidadanía un papel relevante na definición do plan de usos.