Federación de Piragüismo e Náutico Umia reúnense co Concello de Caldas para solicitar que se busquen solucións
29 mares 2019 . Actualizado ás 15:51 h.O Concello de Caldas de Reis albergou este venres unha reunión sobre as dificultades que a situación do río Umia entraña para a práctica deportiva do piragüismo, en concreto, do kaiak polo. O alcalde da localidade, Juan Manuel Rey (PSOE), entrevistouse co presidente da Federación Galega de Piragüismo, Alfredo Bea, e cos directivos do Club Náutico Umia Manuel Rodríguez (presidente) e Déborah Romero (secretaria) para analizar as posibles solucións. Tanto a federación como o club trasladaron ao Concello a súa preocupación polo estado da canle ao seu paso polo centro urbano, que repercute negativamente na práctica deportiva. Citaron expresamente a concentración de cianobacterias, a proliferación da planta invasora Egeria densa e a apertura das comportas das chorreras. O que demandan é que se busque unha alternativa para a práctica do kaiak polo. Desde o Naútico Umia alúdese a que nos últimos anos han tido que trasladar os seus adestramentos e a organización de torneos da liga ao encoro de Pontillón de Castro, en Verducido (Pontevedra), debido á imposibilidade de facelo no Umia. O rexedor comparte a preocupación da federación e o club e entende o seu malestar. Rey comprometeuse a intentar buscar solucións para a mellora das instalacións e arredores do club, lembrando que o Náutico Umia é pioneiro e punteiro en kaiak polo tanto a nivel galego como nacional.