A Consellería de Medio Ambiente afirmou este venres que a suspensión do baño en ríos ou encoros afectados por cianobacterias «é competencia de Sanidade e dos concellos, que son tamén os que deciden que medidas tomar ante a presenza de toxina e anuncios á poboación». A presa do Umia, en Caldas de Reis, leva en estado de alerta por cianobacterias desde o 6 de xullo. Con todo, veciños que se bañan en zonas da canle sosteñen que falta información.
Dicíao onte Ana Jamardo, unha moza de 21 anos que adoita ir bañarse cun grupo de amigos á fervenza de Segade. «Non sabiamos que estaba en alerta por bacterias. Vemos que a auga está sucia e sabiamos que hai anos houbo unha alga que se reproducía moi rápido, pero non sabiamos que podía ser prexudicial para a saúde», apuntou. Ana Jamardo engadiu que en ningún momento viron carteis que alertasen da situación da auga: «Desde que nos decatamos tomamos máis precaucións, como non abrir os ollos ou a boca na auga».
Desde Sanidade indicaron que o 6 de xullo comunicouse ao Concello de Caldas a alerta, e subliñaron que non hai zonas oficiais de baño no encoro do Umia.