Unha unidade militar adéstrase cun helicóptero e unha zódiac en Lapamán
14 feb 2019 . Actualizado ás 15:02 h.Os veciños e visitantes que se achegaron a tarde deste mércores á praia de Lapamán, en Bueu, puideron ser testemuñas dunhas rechamantes manobras de adestramento militar na ría de Pontevedra. Trátase dunha unidade de Forza de Guerra Naval Especial da Armada, que está realizando un dispositivo de adestramento en cuestións relacionados con operacións marítimas, segundo indicaron fontes castrenses.
Neste sentido, por exemplo, os militares utilizaron un helicóptero que se achegou a unha zódiac no medio da ría e desde a que foron baixando os distintos integrantes da unidade, cunha rapidez que chamou a atención dos que observaban curiosos o espectáculo.
Visitas ao Furor
Estes días atópase na ría, con base na Escola Naval, o sexto buque de acción marítima, o Furor, que permanecerá na comarca ata o vindeiro domingo cando porá rumbo para Cartaxena. Pola súa banda, a Armada informou de que o vindeiro sábado se desenvolverá unha xornada de portas abertas que permitirá aos cidadáns coñecer o Furor en horario de dez da mañá a unha da tarde e de catro a seis da tarde.
A presenza do Furor tamén se está deixando ver nas súas saídas ao mar na ría, por exemplo esta mañá de mércores cando este buque militar estivo a navegar entre Sanxenxo e Bueu.