Rías Baixas Film Commission xa ten pechadas reunións con Amazon, Netflix, HBO, Lionsgate, Universal Studios, Warner Bros ou Disney, entre outras firmas da industria audiovisual internacional
06 dic 2025 . Actualizado á 19:22 h.Co dobre obxectivo de promocionar os atractivos turísticos da provincia e, ao tempo, dar a coñecer a oferta das Rías Baixas como plató cinematográfico, a Deputación de Pontevedra recalará os vindeiros 8 e 9 de decembro no Focus London, encontro internacional da industria audiovisual que se celebra no Business Design Centre de Londres. Este evento ten como meta principal a de conectar destinos de rodaxes con profesionais do sector, caso de localizadores, produtores, directores creativos e empresas de post-produción.
O organismo provincial participará neste encontro a través da Rías Baixas Film Commission, para o que xa están pechadas reunións con diversas produtoras de relevancia internacional. Así, citaron as plataformas Amazon, Netflix e HBO, pero tamén estudios como Lionsgate, Universal Studios, Warner Bros ou Disney e HBO, ademais de localizadores e traballadores do audiovisual freelance.
En todas estas entrevistas, «ofreceráselles a guía de rodaxe e presentaranse os lugares máis atractivos da provincia como destino apropiado para grandes producións audiovisuais», destacaron dende a Deputación de Pontevedra. Neste sentido, incidiron en que son conscientes de que en Focus London se poden «establecer contactos directos con localizadores, runners, produtores, estudios de produción, directores e outros perfís creativos e técnicos co obxectivo de atraer novos rodaxes e proxectos audiovisuais ao territorio», ao tempo que se divulgarán «localizacións singulares e recursos técnicos ou institucionais dispoñibles para materializar estas producións», engadiron ao respecto.
Compromiso coa industria
De igual xeito, a institución que preside o popular Luis López ten intención de achegar o se «compromiso coa industria cultural e audiovisual, así como co desenvolvemento económico a través do audiovisual». A comitiva desprazada a Londres, de igual modo, asistirá ás sesións técnicas nas que se analizarán as tendencias actuais do sector, fortalecerán contactos e identificarán oportunidades para impulsar a provincia de Pontevedra como destino de rodaxe estratéxico e innovador.