Reclaman en Pontevedra a Política Social un concurso de traslados para poder conciliar

Un grupo de traballadoras de distintas categorías concentráronse este venres no exterior da Residencia de Maiores de Campolongo, en Pontevedra, para reclamar á Consellería de Política Social que convoque un concurso de traslados. «O persoal ao servizo desta consellería leva once anos sen oportunidades para traballar cerca do seu fogar, xa que son estes os anos que pasaron desde o último concurso de traslados», quéixanse.

Expoñen que se trata dun colectivo maioritariamente feminino, con idades comprendidas entre 45 e 65 anos, onde a maior parte ten ao seu cargo o coidado de fillo ou maiores, «sendo imposible a conciliación ao traballar a 60 quilómetros da súa casa». Remachan os convocantes que, por desgraza, moitas delas vanse a xubilar en breve sen poder optar a un posto de traballo próximo ao seu domicilio, e outras verán crecer aos seus fillos sen poder gozar do dereito que «todas as mulleres deberiamos ter á conciliación familiar».

As afectadas pregúntanse por que precisamente na Consellería de Política Social non se convocan concursos de traslados. Apuntan que no resto de departamentos da Xunta tramítanse con certa frecuencia e piden á conselleira, Fabiola García, que vele polo seu persoal e «coide a quen coida». Lembran que Política Social «vén de promocionar diferentes actos amosando a súa implicación na igualdade entre mulleres e homes, a protección da familia, e a conciliación da vida familiar e laboral para o coidado dos maiores e dos fillos».

María Ángeles Fernández Lozano ten 53 anos e é auxiliar de enfermería. Leva traballando desde o 2015 na residencia de Campolongo en comisión de servizo. Reside en Combarro (Poio) e ten ao seu cargo un fillo de 12 anos, unha nai con 75 anos e demencia e un tío de 72 anos con problemas psíquicos e outras patoloxías graves. A súa praza fixa está nunha residencia asistida de Vigo. Anxos traballa a quendas —mañá, tarde ou noite— e tira de achegados para coidar a eses dous familiares dependentes cando ela está na súa xornada laboral. «Paréceme inxusto, estamos excluídas e é como un castigo. Non sabemos por que non convocan o concurso de traslados. Esta situación xéranos inquedanza e preocupación, que se suma á carga de traballo que afrontamos porque estamos baixo mínimos de persoal», laméntase. Di que, no seu caso, se tivese que ir traballar a Vigo a súa vida poríase patas para arriba e faríaselle aínda máis difícil a conciliación. «Hai compañeiras que pasan dos 60 anos e teñen adaptacións de posto, outras que están a piques de xubilarse e que poderían ter moitas dificultades», subliña.

Desde a Consellería de Política Social limitáronse a sinalar que o concurso de traslados non é a súa competencia, ao depender da Consellería de Facenda.

---

---

---