A praza da Ferrería albergou este venres o acto da campaña da AECC polo día mundial
04 feb 2023 . Actualizado ás 10:48 h.Este sábado conmemórase o Día Mundial contra o Cancro e a AECC de Pontevedra anticipouse un día á celebración. A asociación apostou por levar a súa campaña á praza da Ferrería. Leva por lema Todos contra o cancro e consistiu na formación dun gran lazo humano verde —cor do colectivo— grazas á participación de preto de cincocentas persoas. Tamén se instalou unha mesa informativa. No acto tivo especial protagonismo un paciente do servizo de logopedia da asociación, Francisco Rodríguez, que deu lectura a un manifesto.
«Agora tes tempo de actuar, de moverche contra o cancro. E sei que isto só se pode conseguir se todos nos unimos contra o cancro... Só así poderemos lograr un futuro onde non haxa que pórlle nomes e apelidos a estas cifras ás que ninguén quere ver e ante as cales pasamos de longo», expuxo o paciente. Ademais de voluntarios e profesionais da asociación, sumáronse escolares do colexio Calasancio, Doroteas e Os Salgueiros, e das asociacións Amencer, Alba, Frangil, Xuntos, Sisae e Vaipolorío, tamén membros da Ximnástica de Pontevedra e representantes políticos da cidade.
A campaña deste 4 de febreiro busca crear un movemento social e conseguir que sete de cada dez presentas sobrevivan ao cancro no 2030. Subliña a AECC que esta enfermidade é o problema sociosanitario máis importante do mundo e que un de cada dous homes e unha de cada tres mulleres terán cancro ao longo da súa vida. Na provincia de Pontevedra detectáronse o pasado ano 6.447 novos casos. A AECC recolle os datos do Observatorio do Cancro, que augura que no 2030 haberá en España 330.000 diagnósticos de cancro. En Galicia serán 21.214, e na provincia, 7.157.
