O investigador e profesor Pablo Campo presenta en Pontevedra un libro de boas prácticas dirixido a pacientes e coidadores
03 feb 2023 . Actualizado ás 05:00 h.A Universidade de Vigo presentou este xoves en Pontevedra unha guía que busca mostrar aos pacientes de párkinson como o exercicio terapéutico pode mellor a súa calidade de vida. O traballo foi realizado polo investigador Pablo Campo e editado polo Servizo de Publicacións da institución académica. O libro pon de relevo o papel da fisioterapia no tratamento deste trastorno neurodegenerativo que afecta o sistema nervioso.
Co obxectivo de contribuír a mellorar a calidade de vida dos pacientes de párkinson —uns 160.000 en España—, Pablo Campo publicou Fisioterapia e enfermidade de Párkinson . Trátase dun conxunto de boas prácticas dirixidas a coñecer o que suporá cada estadio da enfermidade, así como o papel que xoga o exercicio terapéutico como elemento modificador da patoloxía. O investigador do grupo HealthyFit e profesor da Facultade de Fisioterapia estivo acompañado na presentación pola vicedecana do campus, Eva María Lantarón.
Pablo Campo explicou que se trata dun guía enfocada fundamentalmente a pacientes e coidadores, que xurdiu das súas propias vivencias como investigador e fisioterapeuta. Un dos eixos da publicación é o papel que poden xogar os fisioterapeutas no tratamento da enfermidade. O párkinson, expuxo Campo, diagnosticábase nun principio como un trastorno do movemento, o que levou a que se prestase máis atención a síntomas motores como a rixidez, a inestabilidade ou os tremores. Con todo, co paso dos anos viuse que os síntomas non motores do párkinson teñen un gran impacto na calidade de vida dos pacientes. Alude a casos de depresión, cadros de estrés ou inquedanza, alteracións do soño, dor terapéutica ou alteracións do sistema nervioso. A fisioterapia axuda, xa que logo, nunha abordaxe global da patoloxía.