Un condutor cóase na AP-9 en Pontevedra cun coche sen carné e choca cun bus cheo de nenos
PONTEVEDRA
O home quedou atrapado no turismo e resultou ferido e os nenos non sufriron danos
27 novs 2022 . Actualizado ás 20:27 h.A autoestrada AP-9 volveu ser esta tarde escenario dun accidente cun compoñente estraño: a presenza dun coche sen carné nesta vía, onde eses vehículos teñen prohibida a entrada. Así, un turismo sen carné conducido por un home coouse na autoestrada, no tramo de Pontevedra , e acabou chocando cun autobús que ía cargado de escolares. O condutor do turismo resultou ferido e os nenos e o chofer do autocar ilesos.
Tal e como informou o servizo de urxencias 112, todo ocorreu sobre as 17.30 horas. Nese momento, recibíronse varias chamadas alertando de que un autobús e un coche sen carné chocaran no punto quilométrico 129 da autoestrada, á altura de Campañó . O home do turismo estaba atrapado e ferido dentro do coche, así que se requiriu a axuda dos Bombeiros de Pontevedra para rescatalo. Unha vez fóra, comprobouse que estaba consciente, pero tiña unha ferida na cabeza e foi desprazado en ambulancia polo 061 ao hospital de Montecelo.
Afortunadamente, os escolares e o chofer do autobús non resultaron feridos. No autocar viaxaban máis de vinte escolares de entre 11 e 12 anos do colexio Andersen, que foron recollidos por outro vehículo para poder chegar ao seu destino.
É difícil saber o motivo polo que o home acabou na autoestrada cun coche sen carné. Crese que puido tratarse dun descoido á hora de incorporarse ao viario.
