Moitos dos canes do centro da Deputación encontaron familias lonxe de Galicia
15 novs 2021 . Actualizado ás 05:00 h.O Centro de Acollida e Protección de Animais (CAAN) da Deputación de Pontevedra volveu a bater unha marca de adopcións a 45 días de que acabe o ano. Se no 2020 foron 583 animais, no que vai de 2021 son xa 587. A saída de Martina, Mini, Lola e Gim permitiron bater esta nova marca, que deixa unha media de máis dun can ao día. E non só quedan na contorna. Moitos deles viaxaron fóra de Galicia para empezar unha nova vida, un deles mesmo se foi para Portugal. Outros 73 animais atoparon familias adoptivas en Castela e León, País Vasco, Cataluña, Madrid, Asturias, Castela a Mancha, Valencia, Canarias ou Estremadura.
Os últimos catro cans adoptados foron recollidos polo persoal do CAAN nos últimos meses. Martina estivo dous meses e medio no centro, mentres Mini, Lola e Gim chegaron ás instalacións de Armenteira o pasado 1 de outubro desde Vilaboa ou Baiona. Estes tres saíron cara a Gondomar o pasado mércores.
Os traballadores do CAAN recolleron a pasada semana dúas camadas de cinco e catro cachorros na Estrada e Valga . No primeiro caso, as tres cadelas, Tani, Tania e Tana e os machos, Tei e Teide estaban nunha vivenda abandonada, mentres no caso de Valga foi protección Civil a que rescatou aos cachorros: Bela, Biuti, Zeltia e Meiga. Estaban metidos no interior dunha tubaxe.