A catedrática María Ángeles Durán reclamou que o deseño urbano teña en conta á poboación que menos se escoita
19 may 2022 . Actualizado ás 12:43 h.«O maior éxito da humanidade nos últimos anos é chegar a ser unha sociedade de vellos». Estas palabras da catedrática de Sociología e profesora do CSIC, María Ángeles Durán, sintetizaron este venres na Facultade Ágora da Deputación de Pontevedra a súa aposta por que o deseño das cidades teña en conta á parte da poboación que máis dificultade ten para facerse oír: «Se nos imos converter nun país vello, preparémonos e gocemos deste cambio demográfico», engadiu.
María Ángeles Durán ofreceu en Ágora unha visión derivada da súa experiencia persoal e do proxecto de cohousing no que participa. Neste sentido, incidiu en que, a partir de una certa idade e para combater a soidade, é precisou buscar formas de vivir que permitan ter compaña para non ser excluídos da sociedade. «Hai que integrar esas residencias, esas iniciativas para que estean en zonas peonís, accesibles», engadiu.
Pero Durán tamén centrou a súa intervención na perspectiva de xénero, tendo en conta que considera que homes e mulleres utilizan de forma diferente a cidade, así como reclamou que os deseños urbanos fomenten a sensación de seguridade. A este respecto, mostrouse convencida de que se se lle pregunta ás mulleres polo esencial dunha urbe, boa parte falará de liberdade no sentido de seguridade. «As mulleres renuncian a utilizar os espazos públicos que, se cadra, quixesen conquistar. Por que? Porque máis vale a prudencia (...)», remarcou criticando duramente a quen criminaliza a unha vítima dun asalto.
Nesta mesma xornada da Facultade Ágora tamén interveu o responsable da empresa de iluminación pontevedresa Setga, Anxo González, incidiu en como o emprego da luz nos espazos públicos pode contribuír a xerar contornas de calidade, mentres que o fotógrafo holandés Iwaan Baan pechou a última intervención da primeira edición dá Facultade Ágora para aludir á súa experiencia como fotógrafo urbano: «Vexo como as persoas se apropian dos lugares, dos edificios e das rúas, e o xeito en que se fai en cada sitio di moito da cidade na que estás».