A súa presenza prolongarase ata o 30 de setembro
04 ago 2021 . Actualizado ás 09:50 h.Tal e como estaba previsto, e ata o 30 de setembro, a Unidade Militar de Urxencias (UME) despregou un continxente de intervención na base militar Xeral Trasfogueiro da Brilat. Procedente do Quinto Batallón de Intervención en Urxencias (BIEM V) desprazáronse ata Pontevedra tropas adscritas ao elemento de recoñecemento (RECO) e un Pelotón de intervención (PIEN) conformado por unha vintena de militares e oito vehículos -dous lixeiros, un de transmisións Mérida, tres autobombas, un abastecedor e un camión de carga-.
Esta unidade está considerada como de primeira intervención, de tal modo que dá capacidade á UME para activarse e intervir ante un incendio forestal nun prazo inferior ás catro horas en apoio das autoridades competentes. O obxectivo é contribuír a que os efectos do lume «sobre a poboación civil, bens e medio ambiente sexan os mínimos».
Desde da Delegación do Goberno en Galicia engadiron que «a plena operatividade do destacamento está garantida de forma continuada as vinte e catro horas do día grazas ás substitucións que se realizarán cunha periodicidade semanal». Así, posibilítase «unha dispoñibilidade permanente do BIEM V, que conta con preto de cincocentos militares, para completar a resposta do Estado na loita contra os incendios forestais na comunidade autónoma de Galicia».