Un can foi envelenado en Portonovo e tres gatos en Mollavao
26 feb 2021 . Actualizado ás 05:00 h.Yako era o nome dun bóxer que tivo que ser sacrificado esta fin# de semana para evitarlle un sufrimento a maiores tras ter sido envelenado en Portonovo . E é que, nos últimos días, particulares e asociacións animalistas viñeron denunciando distintos episodios de malos tratos animal que se sucederon en distintos puntos da comarca de Pontevedra.
Así, tras lembrar que en xaneiro un gato foi tiroteado en Pontevedra, Difusión Felina lamentou que Vilaboa fose escenario dun novo suceso de similares características. O pasado martes, foi localizado un gato en Larache, en Santa Cristina de Cobres (Vilaboa) co impacto dun proxectil aloxado na columna. «Está pendente a súa valoración para ver se chegará a recuperarse, xa que actualmente se atopa paralizado das patas traseiras», lamentaron.
Dáse a circunstancia de que leste mesmo martes, a asociación tivo constancia dun novo caso de envelenamento de tres gatos en Mollavao. Trátase dun punto no que, con anterioridade, xa se produciron feitos similares, de tal modo que dous dos felinos xa morreron, mentres que o terceiro «se atopa ingresado con prognóstico moi grave».
En ambos os casos, Difusión Felina de Pontevedra anunciou a interposición das correspondentes denuncias.
Esta mesma vía foi emprendida polo propietario de Yako, quen xa deu conta do ocorrido no posto da Garda Civil de Sanxenxo . Na súa denuncia relata que o envelenamento se produciu o pasado sábado cando o can, tras un paseo pola praia de Baltar e cando xa se atopaban no seu domicilio de Portonovo, comezou «a pórse mal, vomitando e cunha gran hemorraxia por vía anal».
Alarmado, desprazouse coa súa mascota a unha clínica veterinaria do Grove. Alí, e a pesar dos esforzos, nada se puido facer polo bóxer que, para aliviarlle o sufrimento, tivo que ser sacrificado o domingo.
No escrito tramitado ante a Garda Civil recóllese, así mesmo, que existe unha testemuña que puido observar como unha muller guindaba o que, en principio, cre que podería ser veleno pola zona.