As axudas do Concello a microempresas e autónomos terán carácter retroactivo
PONTEVEDRA
Unha xunta de goberno extraordinaria aprobou este venres as bases da convocatoria do plan Supera20, que é como bautizou o Concello á súa liña de axudas a autónomos e microempresas afectados pola pandemia. A portavoz do goberno local, Anabel Gulías (BNG), definiu este plan como unha ferramenta «diferente e novedosa».
Subliñou que co «obxectivo básico de preservar a economía local, maioritariamente a de proximidade» o goberno local non se expuxo a concesión das axudas «coma un recurso meramente asistencial senón que pretendemos que teñan un efecto multiplicador sobre a economía da cidade».
Así, o que se fará é cofinanciar con ata 5.000 euros actuacións destinadas a mellorar os negocios, establecementos ou sedes. Deste xeito agárdase que se axude aos perceptores directos das axudas e tamén a outras empresas locais que poidan ser contratadas polos beneficiarios para acometer as melloras no seu negocio.
Gulías lembrou que poderán acollerse ao plan Supera20 traballadores autónomos, entidades de economía social e microempresas con ata dez empregados e «que acrediten que non tiveron actividade durante o estado de alarma». A porcentaxe subvencionable poderá chegar ata o 70 % do custo da actuación ou proxecto e contémplase un anticipo do 75 % de importe da axuda unha vez concedida.
Así mesmo, Gulías, subliñou que a convocatoria terá carácter retroactivo, é dicir que pode presentarse proxectos xa executados desde o mes de marzo, cando se decretou o estado de alarma, ata agora.
O Concello dispón dunha partida de 1.250.000 euros para esta convocatoria, que agarda resolver en pouco máis dun mes. En canto publíquense as bases, haberá quince días para presentar as solicitudes e outros quince para puntualas segundo un baremo incluído na convocatoria. A idea é que en novembro poidan estar resoltas.
O Concello non descarta dotar economicamente unha segunda convocatoria do plan Supera20 se se rexistra un elevado número de solicitudes e hai moitas que queden fose.