Un Quixote en azulexos liga unha casa de Ponte Caldelas coa súa xemelga no Brasil
PONTEVEDRA
Un emigrante homenaxeou a ambos os dous lados do Atlántico a inmortal obra de Cervantes
30 jun 2020 . Actualizado ás 16:44 h.A fachada dunha casa en Ponte Caldelas é unha obra literaria, unha xoia arquitectónica e unha ligazón entre Galicia e Brasil. Situada preto da ponte sobre o Verdugo, o mesmo do que a vila toma o seu nome, a casa, de estilo indiano, foi feita construír pola familia Martínez Garrido. Segundo sinalan veciños da zona, o inmoble levantouse como copia doutra que edificaron en San Salvador de Baía, onde emigraron. O inmoble probablemente date dos anos trinta, como outros chalés e casas de estilo indiano da comarca.
Os azulexos nas fachadas parecen unha innovación traída polos inmigrantes caldelanos, unha moda artística que aínda se pode observar en múltiples vivendas da época. Neste caso, as pezas esmaltadas son diferentes, afastadas dos deseños florais ou figuras xeométricas, contan unha historia e vaia historia. Por algunha razón que non transcendeu, o seu promotor decidiu decorar a súa casa coa historia máis inmortal de Cervantes e cume literario das letras españolas: o Quixote.
A historia hai que lela de forma vertical e coma se fosen os fotogramas dun película de cine, mentres a vida e aventuras do enxeñoso cabaleiro don Quixote da Macha desfilan ante os nosos ollos. Alí está a famosa escena dos muíños de vento, que acabou co pobre don Quixote polos chans. Noutro se pode ver o episodio da venda, onde o hidalgo manchego velou a garda para ser nomeado cabaleiro. Noutros se pode contemplar a Sancho Bandullo ao lado do seu señor, que a lombos de Rocinante e cunha lanza e escudo, atravesaba os camiños en procura de aventuras e de fazañas que o fixesen merecedor da súa amada Dulcinea do Toboso. Dan ganas de coller o libro e pórse a identificar as escenas que ilustran a fachada.
Cando anos despois se fixo un anexo á vivenda, continuouse coa tradición establecida e a fachada gañou dúas novas fileiras de azulexos tamén de temática quijotesca. Ao sumar o total saen 66 distintas escenas coa vida do cabaleiro da Triste Figura.
Os azulexos de fabricaron en Sevilla. Fíxoos unha empresa chamada Meneses, que tamén produciu os esmaltes que decoran a orixinal casa brasileira e que conmemorou a esta famosa parella das letras nun parque andaluz e un casino en Triana.
Pois xa saben, cun xogo de palabras e en homenaxe ao xenio da literatura universal, se queren revisar os seus coñecementos sobre óbraa cume de Cervantes, pasen por aquí. Nun lugar de Galicia, de cuxo nome si podo acordarme: Ponte Caldelas.