Hospitais e centros da área sanitaria de Pontevedra difunden mensaxes para cambiar hábitos
13 ene 2020 . Actualizado ás 10:38 h.Mensaxes directas que animan a andar e a non coller o ascensor e que recalcan os beneficios da actividade física sobre a saúde. A dirección da área sanitaria de Pontevedra e O Salnés iniciou fai uns días a instalación duns carteis en hospitais e centros de saúde para fomentar estilos de vida saudables. No caso da cidade, xa están colocados nos dous hospitais públicos, Montecelo e Provincial, no centro de especialidades de Mollavao (Casa do Mar) e no ambulatorio Virxe Peregrina. Non se trata dunha iniciativa nada en Pontevedra, senón dun programa da Consellería de Sanidade a través da Dirección Xeral de Saúde Pública.
Traballadores sanitarios, pacientes e familiares fixáronse neses reclamos, de distintas cores e con mensaxes diversas, que se distribuíron polos espazos sanitarios de uso compartido (banzos de escaleiras, descansos de escaleiras, corredores ou entradas). A iniciativa denomínase Chanzo a Chanzo Coida a túa saúde.
Para moitos pode ser algo anecdótico, pero desde a dirección da área sanitaria alúdese ao impacto que pode ter aquilo que entra pola vista, case sen darnos conta. Que tipo de mensaxes informativas difúndense? Son máis dunha decena. Hainos que inciden nos beneficios que subir escaleiras ten para a saúde e nas calorías que se queiman. A directriz é colocar dous carteis por cada tramo de escaleira. Con distintas cores (verde, azul e branco), pero sempre os do cartel principal. Transmiten que cada minuto se queiman 9 kilocalorías, o que contribúe a un menor risco de ictus, cancro de colon ou de pulmón, hipertensión arterial, morte temperá ou de enfermidades crónicas. Tamén se difunden outras mensaxes relativas á que a actividade física mellora a imaxe corporal e a autoestima, os procesos de memorización, fortalece glúteos e pernas e á necesidade de manter un peso saudable.
Tamén se colocaron carteis de reforzo nalgúns descansos das escaleiras e na entrada da zona de acceso aos ascensores nos garaxes. Aí figura a lenda «Mellor a pé!». No chan dos corredores hai un cartel e pegadas indicando as calorías que se queiman por minutos e mensaxes informativas sobre a saúde.
Esta iniciativa de fomento de hábitos saudables súmase á que os hospitais públicos de Pontevedra levaron a cabo o pasado verán para reforzar, con nova sinalización, a prohibición xa existente de fumar tabaco ou cigarros electrónicos neses ámbitos sanitarios.
