Concello de Caldas e Garda Civil estudan unha permuta de terreos para ampliar servizos
PONTEVEDRA
A subdelegada do Goberno en Pontevedra, Maica Larriba, o alcalde de Caldas de Reis, Juan Manuel Rey (PSOE), e o coronel da Comandancia da Garda Civil, Simón Venzal, abordaron onte unha proposta municipal que melloraría as actuais instalacións do cuartel da localidade e os seus servizos. O rexedor expuxo a proposta de permuta de terreos municipais para ampliar a zona de aparcadoiros e almacéns do cuartel, lindantes coa localización actual.
Rey fixo fincapé en que, con esa permuta, o Concello podería ampliar unha das rúas contiguas ao cuartel de Garda Civil, mellorando así a urbanización nesta zona. En concreto, trátase da travesía de Dona Urraca, onde a Administración local quere desenvolver un proxecto de ampliación e urbanización durante o 2020. Nesa zona está en construción un edificio multiusos e tamén se pretende situar o futuro centro de saúde.
Pola súa banda, Simón Venzal considerou «viable» a proposta do goberno local de Caldas e comprometeuse a informar as instancias correspondentes do Ministerio do Interior para realizar a tramitación oportuna para levar a bo fin esta permuta. O alcalde de Caldas agradeceu a mediación da subdelegada e a receptividade manifestada polo coronel xefe da Comandancia.
Maica Larriba manifestou, pola súa banda, a súa satisfacción pola disposición tanto por parte do responsable da Garda Civil en Pontevedra como polo propio alcalde para chegar a acordos de colaboración. Acordos, dixo, «que conlevan melloras na vida municipal dos concellos pontevedreses, neste caso para os veciños de Caldas».