O futuro contrato de limpeza podería custar entre 11 e 13 millóns ao ano
PONTEVEDRA
A empresa adxudicataria terá que asumir investimentos por uns 23 millóns en Pontevedra
08 dic 2019 . Actualizado ás 05:00 h.O Concello de Pontevedra traballa desde hai meses no deseño do futuro contrato de recollida de lixo. O actual está prorrogado e, aínda que cabería a posibilidade de acordar coa empresa concesionaria unha nova ampliación, o obxectivo é non acudir a ela e que a partir do 3 de xuño do 2021 entre a traballar a nova concesionaria coas determinacións que marque o novo contrato. Leste contemplará, entre outras cousas, a implantación a pleno rendemento do plan de compostaxe municipal, tanto doméstico como comunitario, así como a xestión da nova planta de tratamento.
De momento trabállase sobre a base do documento elaborado pola consultora Lagares e Oca para elaborar o prego de condicións que rexerá o futuro concurso. A idea é convocalo despois do próximo verán. Antes poranse en común as suxestións expostas polos veciños a través da consulta aberta na web municipal, e de diversos colectivos cos que o Concello está a manter xa reunións.
E aínda que a día de hoxe non hai nada pechado, o concelleiro responsable do servizo, Raimundo González Carballo (BNG), cre que é posible anticipar o custo que podería ter o futuro contrato: entre 11 e 13 millóns de euros anuais.
A cifra adquire a súa plena dimensión se se compara co que paga actualmente o Concello á empresa concesionaria: este ano, 5,9 millóns de euros. Aínda que González Carballo subliña que sumando os custos de tratamento (é dicir, o canon de Sogama), a limpeza de instalacións e dependencias municipais e outros gastos o custo actual rolda os dez millóns, é obvio que o futuro contrato adquirirá unha dimensión económica inaudita en Pontevedra.
O concelleiro adianta outra cifra: a empresa que se faga coa concesión terá que asumir investimentos por entre 20 e 23 millóns de euros. Boa parte destinarase á construción da planta de compostaxe na Canicouva, pero tamén se prevé unha completa renovación do material de limpeza e de recollida.
A planta de compostaxe da Canicouva creará de 15 a 20 postos de traballo
Unha das claves do futuro contrato do lixo virará en torno ao plan de compostaxe municipal. E aí a peza fundamental será a planta da Canicouva, da que vén falando desde o ano 2015 e para a que o Concello leva xa varios anos pagando á comunidade de montes pola reserva duns terreos que, polo momento, seguen sen uso algún.
Agora mesmo, está a traballarse en definir o sistema que se empregará, o volume e a capacidade da futura planta. E González Carballo chegou a apuntar recentemente que non se descarta que haxa dúas instalacións municipais: unha para separar os biorresiduos de elementos que non son aptos para o compost; e outra para a elaboración do compost. «Non hai nada pechado», afirmaba o concelleiro.
O que si se estudou xa é o volume de emprego que podería xerar unha planta como a que presumiblemente necesitaría Pontevedra, e a conclusión é que o seu funcionamento xerará entre 15 e 20 postos de traballo. Obviamente, será persoal que haberá que contratar a maiores dos que xa están adscritos ao servizo de limpeza e recollida de lixos. Igual que o persoal específico para atender e xestionar os composteros comunitarios, supervisar os domésticos e instruír á poboación sobre a separación en orixe e outros conceptos que cada día se irán facendo máis cotiáns.
Precisamente, o incremento de persoal que haberá de asumir a nova empresa con respecto ao persoal actual é un dos factores que dispararán o custo do futuro contrato.