O comité de crise de Caldas fracasa un ano despois ao non lograr solucións para o Umia
PONTEVEDRA
Goberno e oposición din que só se visibilizó o problema
24 ago 2019 . Actualizado ás 05:00 h.O Concello de Caldas de Reis creaba fai un ano, o 29 de agosto do 2018, un comité de crise para reclamar á Xunta soluciones para o río e o encoro do Umia. Este órgano, que estaba integrado polos catro partidos políticos con representación municipal -PSOE, PP, ICdR e BNG-, xurdiu despois de que se activase a alerta na presa debido á proliferación de cianobacterias e de que se prohibise o baño no dique e na fervenza de Segade.
Doce meses despois toca facer balance. Segue vivo ese comité de crise? Serviu para algo? O gabinete non foi disolto oficialmente, pero tanto o alcalde, Juan Manuel Rey (PSOE), como a oposición coinciden en que non está operativo. O rexedor sostén que o comité serviu para pór no candelero o río e denunciar o abandono por parte da Administración autonómica. Admite, no entanto, que non se recolleron os froitos agardados. «A día de hoxe -recoñece Rey - serviu de nada ou de moi pouco. Non conseguimos que o presidente Feijoo nos recibise e o único compromiso materializado é a reparación da EDAR de Paradivas». Unhas obras que financia Augas de Galicia e que empezarán en setembro.
O alcalde é claro: seguir reunindo ao comité non ten sentido. Polo menos, mentres a situación na presa non empeore: «Negámonos a que se sigan rindo de nós e non o imos a reproducir, salvo que afecte o abastecemento». De momento, a ETAP realiza dúas autolavados dos filtros ao día -o habitual é un- e a partir da próxima semana renovar o carbón activo. O tratamento con ozono non é necesario, de momento, segundo o Concello. Rey tamén alude a que neste ano houbo unhas eleccións e o entón portavoz de ICdR é hoxe o líder do PP. «Presentouse coa bandeira de recuperar o río e o problema está en mans do PP», resolve o rexedor.
Desde o PP, Fernando Pérez alude a que hai que seguir traballando polo río sen buscar rendibilidade política. Cre que o comité podería servir para máis e anuncia que ten pedida unha reunión con Augas de Galicia para tratar a Microcystis e a Egeria. «Imos seguir apertando ás Administracións responsables ata volver ter un río como antes», apunta.
Pola súa banda, desde as filas do BNG consideran «desartellado» o comité de crise. O seu portavoz, Manuel Fariña, entende que si valeu para visibilizar que a Xunta converteu un río vivo nun «camposanto de fondos públicos e nun gravísimo problema de saúde pública». «Esta loita continúa», advirten os nacionalistas.
O Defensor do Pobo require a Augas de Galicia un informe pola alerta da presa
O Defensor do Pobo acaba de dar a razón aos opositores ao encoro do Umia, en Caldas de Reis. A Coordinadora Antiencoro acudiu a este órgano o pasado mes de maio ante o silencio da Xunta a unha petición relativa ao informe especial previsto na Declaración de Impacto Ambiental (DIA) do encoro de Caldas. A DIA regula o programa de seguimento e vixilancia da presa e recolle a obrigación de emitir un informe especial cando se presenten circunstancias ou sucesos excepcionais que impliquen deterioracións ambientais ou situacións de risco, tanto na fase de construción como na de funcionamento.
O colectivo veciñal sostén que o río Umia atópase nunha situación de excepcionalidade, «ao punto de terse decretado polas autoridades autonómicas o nivel de alerta polo mal estado da auga». Alude á presenza de cianobacterias e á eutrofización que desde o 2006 sofre o encoro cada verán. Este 2019 está en estado de alerta desde o 24 de xuño. Ante o silencio da Consellería de Medio Ambiente, que non contestou á solicitude, a Coordinadora acudiu ao Defensor do Pobo. Agora este órgano, nun escrito que leva data do 12 de agosto, require a Augas de Galicia a elaboración e remisión do informe especial previsto na DIA do encoro e a súa subministración á Coordinadora. O órgano relata que a consellería lle contestou no seu día que o informe corresponde a Augas de Galicia, dependente do departamento de Infraestruturas.