A alcaldesa remacha que diálogo e traballo «sen descanso» teñen que ser a receita
16 jun 2019 . Actualizado ás 05:00 h.A popular María Ramallo foi investida este sábado alcaldesa de Marín, un cargo que ocupa desde fai oito anos. Tras o resultado do 26M, xestionará o Concello cunha folgada maioría absoluta ao lograr 15 dos 21 concelleiros da corporación. A rexedora admitiu que o seu sentimento é «indescritible». A pesar diso fixo fincapé en que os éxitos nunca son individuais, senón que «este deporte é de equipo».
Ramallo lembrou que leva 24 anos dedicada á vida municipal, na que entrou un pouco de casualidade, dixo. O primeiro que aprendeu foi con Augusto Casal á fronte do Concello, aínda que aludiu a que o primeiro alcalde democrático foi José Manuel Pierre, con quen lle unía unha boa relación persoal. A rexedora sinalou que o camiño non foi doado e que no 2007 gañaron as eleccións en votos pero non puideron gobernar. Si o farían catro anos máis tarde, no 2011.
Para ela está clara cal é a receita. Un estilo de «escalar, marcarnos metas, ir superando etapas, pero tratando de facer sempre relevos». A política, remachou, é «sen dúbida unha carreira de fondo cos seus esprints nos momentos álxidos». Para ela, o salón de plenos é ese marco onde a palabra, o debate e as distintas posturas teñen cabida, «sempre engadindo e nunca destruíndo». Para a popular a base da acción política é intentar solucionar os problemas dos veciños e non crear máis. «Todo iso é a política con maiúsculas que debemos practicar, regándoa con moitas horas, dedicación, unión, equipo, atención, esixencia e, sen dúbida, éxito», expuxo.
Aludiu tamén á súa acción de goberno durante os últimos oito anos. Afirmou que as infraestruturas viarias e deportivas e a reforma urbana vaise estendendo a moitas rúas, xunto á atención ás parroquias. Citou as melloras nas redes de saneamento e de auga, en praias, carreiros, espazos de lecer, parques e xardíns, pero tamén a atención desde servizos sociais, a mellora das infraestruturas sanitarias, centros escolares, as actividades de dinamización, deportivas, culturais, «o rigor económico, a seriedade e a cercanía».
Respecto ao futuro, que son os catro anos que o goberno local pero tamén a oposición teñen por diante, Ramallo asegurou que é tempo de expor propostas e melloras, e de impulsar proxectos. Prometeu que o seu equipo traballará «sen descanso como ven facendo». Aproveitou para reivindicar o papel de alcaldes e concelleiros, dignificando unha profesión moitas veces aldraxada inxustamente: «Nada supón para min máis honor que ser alcaldesa de Marín dende hai oito anos. E digo que nada poderá supoñer máis honor que seguir séndoo». Tras dar as grazas, a rexedora pechou a súa intervención pedindo que «a Virxe do Carme acompáñeme».