Os centros teñen xornadas de portas abertas e visitas guiadas ante a proximidade do proceso de solicitude de praza
07 feb 2020 . Actualizado ás 16:22 h.«Sen dúbida, unha das decisións máis complicadas na miña vida como nai foi a elección do colexio. Cando tocou tan delicado tema, empecei por facer unha folla de Excel cos aspectos que ambos os pais considerabamos importantes na educación da nosa filla...». Este é un extracto dun texto colgado por unha nai -autora da archiconocida e visita web www.vigopeques.com- e reflicte ben a preocupación que senten actualmente numerosas familias que están a piques de escoller centro escolar para os seus fillos de tres anos. Que os pais vivan tan intensamente o proceso soa case normal. O curioso é que nos centros esta etapa previa á admisión de alumnos -o prazo comeza o 1 de marzo e prolóngase ata o 20- tamén leva con auténtico frenesí. Por que? Porque ata nos colexios con máis demanda son conscientes de que a natalidade segue caendo e de hai que envorcarse coa captación de alumnado.
O caso máis extremo, loxicamente, é o das escolas unitarias do rural. Neste caso, profesores e pais, envorcados coa causa, practicamente buscan alumno familia a familia para evitar que a matrícula non baixe de seis nenos por centro e Educación non bote o ferrollo. Ocorre así en Sanxenxo, Barro ou Moraña.
Pero a necesidade de captar alumnos non é exclusiva das unitarias nin do rural. Cóase ata no mesmo corazón da cidade pontevedresa, onde varios centros baixaron en matrícula no último ano. Onte, desde o CEIP Xunqueira I, así como desde o Vidal Portela ou o Praza de Barcelos, indicaban que terán xornadas de portas abertas para as familias e cantaban as excelencias dos centros. No Xunqueira I destacaban que contan con profesorado novo, que traballaba por proxectos e con aulas con cociente baixa, duns 16 nenos por clase; no Praza de Barcelos enxalzaban os seus recreos nun parque infantil ao aire libre ou o feito de que infantil se impartan materias non obrigatorias como psicomotricidade e música. Desde o Vidal Portela aludían ao seu profesorado con longa experiencia e «moi próximo» e a que é un centro totalmente accesible.
Incluso os colexios con máis demanda tamén se envorcan coa admisión. No Álvarez Limeses non hai xornada de portas abertas como tal, pero fanse visitas guiadas ás familias -preferentemente os martes polas tardes- e no Froebel tamén hai día para recibir aos pais. Marcouse para o 19.