Os cadros de Francisco Ramos poderán visitarse no Museo Municipal ata xaneiro do 2020
09 oct 2019 . Actualizado ás 05:00 h.O ourensán Francisco Ramos, natural de Morgade (Xinzo de Limia), acaba de presentar no Museo Municipal a que é a súa primeira exposición individual. Baixo o título Fragmentos de existencia, o artista reúne unha colección de vinte acuarelas e un óleo nos que comezou a traballar fai catro anos, cando lle propuxo á dirección do museo ourensán a realización desta mostra. «Quería facer un resumo vital dun proceso autoxenético. Para min verdadeiramente foi unha sorpresa moi agradable recibir a chamada dá directora na que me comunicaba que íamos adiante coa exposición», explica Ramos.
Nos seus cadros destaca a capacidade para plasmar imaxes cotiás como natureza, igrexas, paisaxes de Galicia... sobre os que aplica un puntillismo de cor que os fai diferentes e achégalles brillo e alegría, a partes iguais. Precisamente esta sintonía non é casualidade. «Hai escenas que se as representase ao natural podían parecer cargadas de tristura e soidade, por iso decidín usar a cor, co fin de poder expresar vida», conta.
As súas obras formarán parte do Museo Municipal ata xaneiro do 2020 e, aínda que acaba de estrear, parece que ao público ourensán gústalle o traballo de Ramos se se atende á asistencia dos últimos días. «Estou notando que á xente lle gusta e que atopan a vida e a alegría na miña obra, algo que para min é moi importante. Polo de agora, coméntanme que lles agrada que cada cadro sexa distinto para romper coa monotonía», afirma o autor. Aínda así, Francisco Ramos admite que os seus familiares e amigos decatáronse fai ben pouco da súa afección e da súa vocación pola pintura. «Moita xente sorprendeuse porque non sabían nada, non quería contalo sen ter unha mostra en marcha. Estou moi contento e quero desfrutalo ao máximo», finaliza o artista.