Vilamartín traballa para reabrir o albergue municipal no Camiño de Inverno este verán
VILAMARTÍN DE VALDEORRAS
A partida para acondicionar o inmoble aparece no orzamento de 1,5 millóns para 2018
11 abr 2018 . Actualizado ás 05:00 h.A zona do Bañadoiro, co albergue e a piscina, é o punto turístico que o Concello de Vilamartín quere potenciar de cara ao verán. As dúas instalacións están agora pechadas (e non poderían abrirse tal e como están) porque non cumpren a normativa, polo que nos orzamentos deste ano contémplanse senllas partidas que suman máis de 100.000 euros para pólas en marcha.
É só o inicio, porque se finalmente os concellos poden gastar o remanente (Vilamartín ten 380.000 euros que ata agora o Ministerio de Facenda non deixaba tocar) haberá máis obras na piscina, que tivo que ser clausurada ao final da pasada tempada de verán porque non cumpría as esixencias de Sanidade. Cunha partida de 40.000 euros vaise levantar a zona da praia ao redor do vaso e poranse baños e duchas novos, ademais de arranxarse o valado nos lugares onde sexa posible e cambialo naqueles puntos onde o estado de deterioración sexa tal que non sexa posible arranxalo. «Ademais diso estamos redactando o proxecto para levantar o liner, que xa ten máis de 15 anos e xa non reúne as condicións; perdeu a cor e está roto nun montón de sitios, polo que perde moita auga», explica o alcalde, Enrique Álvarez Barreiro. Tamén é intención do goberno facer melloras na zona de cafetería.
En canto ao albergue municipal no Camiño de Inverno, destinaranse 60.000 euros a acondicionar o interior para cumprir as normas que esixe Turismo. «Hai que habilitar unha zona de estar, poñer calefacción, abrir algunhas fiestras e illar o edificio, así como redistribuír todo en zona de homes e de mulleres», sinala Álvarez. O 90 % do custo será asumido con fondos Agader a través do GRD.
A actuación na zona do Bañadoiro é unha das partidas máis importantes do orzamento deste ano, que será aprobado en pleno mañá, e que ascende a 1.590.000 euros. Outra gran partida, de 110.000 euros (48.000 procedentes dos plans provinciais) destinarase a reformar a rúa principal da vila de Portela. «Imos levantar a rúa principal para poñer todas as acometidas e as baixantes das casas, que irán ás pluviais; e cambiaremos a canalización dos desaugues nun tramo de 20 ou 30 metros, que está mal, porque o resto está novo. Despois de repoñer o firme, faremos beirarrúas perimetrais desde a Casa de Camba ata a praza de Santa Ana», explica Barreiro.
Outros 33.000 euros (estes de o plan Marco) destinaranse a arranxar o camiño que vai ao depósito de auga de San Miguel, no que tamén se cambiarán os tubos actuais para pór uns máis anchos. Ademais, na zona das covas levantaranse uns 300 metros de asfalto no Camiño do Caño para cambiar as instalacións de tubaxes, entre elas a de auga da traída, porque é de fibrocemento. A actuación custará uns 60.000 euros.
Tamén está previsto rematar a obra de canalización a auga desde o río Farelos para abastecer Valdegodos e Córgomo. Os traballos custarán uns 15.000 euros. Ademais, entre ambos os pobos estase realizando a ampliación da estrada. E botarase unha capa de aglomerado na estrada de Córgomo a Portela. Farase cos 33.000 euros das obras do plan Marco do ano pasado. A esa cifra engadirase unha partida duns 12.000 euros máis para poder facer as cunetas con formigón para que no caso de que se crucen dous vehículos, poidan usar este espazo a maiores para pasar sen dificultade.
Finalmente, tamén haberá unha pequena partida para rematar as obras de remodelación da antiga sede de Cruz Vermella para convertela nun centro de venda de produtos típicos. «A idea é sacala a concurso en canto rematemos, esperamos que antes do verán», remata o rexedor.