Numerosos medios de extinción estiveron durante sete horas sufocando as chamas, que esnaquizaron parte da instalación
09 ene 2020 . Actualizado ás 10:13 h.Un incendio de causas por agora descoñecidas afectou na noite do mércores a unha nave industrial, en concreto un serradoiro, do polígono empresarial de Vilamarín. Os bombeiros do Carballiño recibiron o aviso pouco antes das nove da noite, desprazando ata o lugar dúas unidades, que posteriormente foron reforzadas por efectivos de Protección Civil de Vilamarín e O Carballiño, así como do GES de Ribadavia. Dentro da nave, situada ao pé da N-525 e moi preto dunha gasolineira, almacenábase unha gran cantidade de serrín polo que foi necesario tamén a presenza, para evitar a rápida propagación das chamas, dunha dotación da Deputación e outra de Axega. Entre todos lograron controlar o incendio e evitar que se estendese pola zona empresarial de Tamallancos. Segundo confirmaron esta mesma mañá os bombeiros do Carballiño, permaneceron na zona ata as catro da madrugada.
Por fortuna, á hora á que se iniciaron as chamas non había ninguén dentro da nave, polo que non se produciron danos persoais. Nas próximas horas farase, seguramente, unha valoración dos danos materiais, xa que o tellado da nave veu abaixo durante o incendio.