Esta madrugada comezou a instalación da iluminación da capital e concellos como O Barco ou Ribadavia xa as acenderon
02 dic 2020 . Actualizado ás 00:01 h.O Nadal chegou a algúns escaparates este ano mesmo antes do previsto. Din os que a estrearon na provincia que foi co fin de alegrar un pouco as rúas. A pandemia conseguiu trasladar a incerteza mesmo a esta tradicional época do ano, pois aínda non se sabe como se celebrará. Seguro que non haberá aglomeracións, nin moitos comensais á mesa e que primarán a distancia e a seguridade. O que si seguirá habendo son iluminacións do Nadal e o Concello do Bolo foi o máis madrugador do 2020. Desde o pasado 20 de novembro está acendido o seu, no que o castelo ten un papel protagonista e loce moito máis agora. O venres, coincidindo co Black Friday, no Concello do Barco acendéronse as luces, seguindo a petición dos comerciantes e adiantando así a data inicialmente prevista para o día 1. O luns foi a quenda da Rúa, Petín e Larouco. Tamén acenderon parte da decoración luminosa en Vilamartín e Toén, en ambos continuarán colocando adornos aínda esta semana.
En Ribadavia, o aceso do Nadal tivo lugar este martes. O Concello agradeceu a colaboración dos veciños, das asociacións de Mulleres Rurais e de Empresas do Ribeiro e do estudo de arte Rocío Estévez na decoración. Horas máis tarde comezaba na capital a montaxe da que é a iluminación de Nadal máis caro da historia de Ourense. A empresa empezou a instalación esta medianoite pola céntrica rúa do Paseo, aínda que fontes municipais indicaron que non hai unha data determinada para o seu aceso, que aseguran será «pronto». Na maioría de concellos da provincia haberá que agardar.
En Allariz están ultimando as escenografías do Nadal coas que decoran todo o pobo. Este ano engaden sorpresas con tres novos decorados invernais na alameda, a praza do Concello e a zona comercial. O resultado estará listo o venres pola tarde. Ese mesmo día iluminaranse as rúas de Pereiro de Aguiar e de Xinzo, que pretende chegar ao máximo número de persoas posible e incorpora decoración nos 35 núcleos rurais do municipio. Durante a fin de semana sumaranse O Carballiño, Oímbra e Celanova. Neste último, os comerciantes da rúa Colón e os veciños da Ermida levan días decorando as súas zonas.
En Maceda só porán árbore e dedicarán o diñeiro reservado á iluminación a gastos relacionados co covid. Pola súa banda, en Verín as luces acenderanse o domingo e en Barbadás o luns. Aquí os balcóns, fiestras e portais mellor decorados teñen premio. O prazo para inscribirse no concurso é ata o día 12.
En Trives confían en poder colocar e acender a iluminación do Nadal ao longo desta semana. E para a próxima queda en Parada de Sil, Castro Caldelas, A Gudiña e Viana do Bolo. Na semana do 14 está previsto que se acenda o Nadal nas rúas de Manzaneda e uns días máis tarde, cara ao 20, farano as de Rubiá e de Carballeda de Valdeorras. Non teñen data na Veiga, onde os veciños colaboran co deseño, elaboración e colocación do decorado do Nadal instalado polo territorio municipal. O goberno local decidiu agardar un pouco máis debido ao coronavirus.
