Os aparellos de calistenia custaron algo máis de 19.500 euros
16 oct 2019 . Actualizado ás 05:00 h.O Concello de Verín ampliou o parque biosaludable da Braña, na parroquia de Cabreiroá, para dotalo de máis aparellos de ximnasia. Barras americanas triplas, paralelas, argollas e outros elementos foron instalados en días pasados, nunha actuación que conta cun orzamento de 19.641 euros (dos que o 47 % foron sufragados polo Agader e o resto corre a cargo das arcas municipais). Ademais, colocouse grava miúda para asegurar a amortiguación das caídas. É algo así como un ximnasio ao aire libre, xa que conta con elementos que adoita haber nas instalacións pechadas deste tipo.
«O obxecto desta ampliación do equipamento é cubrir as necesidades e expectativas de todos os usuarios da zona biosaludable, desde os máis pequenos aos máis maiores, pasando polos mozos máis activos e deportistas, contribuíndo así a crear un espazo deportivo de lecer máis completo e confortable, tendo en conta, ademais, o ámbito natural no que se atopa», explica o alcalde, Gerardo Seoane. No parque de Cabreiroá existe unha extensa área recreativa -«moi concorrida» apunta o rexedor- dotada de bancos e mesas de madeira, un parque infantil, un circuíto de equipamentos biosaludables para que poidan exercitarse as persoas maiores de xeito seguro, e un circuíto de equipamentos deportivos de madeira e aceiro, enfocado a persoas con boa condición física.