Sete establecementos hostaleiros do municipio competirán cos seus mellores petiscos a última fin de semana de xuño e o primeiro de xullo
20 jun 2021 . Actualizado ás 19:35 h.Levará por título «Toén a bocados» e é un concurso gastronómico que pretende ser o primeiro paso dunha iniciativa que nace con vocación de continuidade para fomentar as visitas á zona. Así o explicaban na presentación oficial os representantes dos establecementos hostaleiros e o propio alcalde do Concello de Toén, Ricardo González, que matizaba que se trata de dar a coñecer o municipio e a hostalería da zona coa gastronomía como escusa. «Polo horario do concurso é unha oportunidade fantástica para combinar turismo e gastronomía ao longo do noso concello. Gozaremos de catro días especiais e pedimos a todos os amigos que nos acompañen que nos axuden a manter en todo momento as medidas vixentes de protección contra o covid», sinalou o rexedor. Andrés González, do café O Pego, que exerceu de portavoz dos sete hostaleiros que se sumaron á iniciativa, sinalou que agardan tanto aos clientes habituais como atraer a «afeccionados á gastronomía de Ourense e de Barbadás , xa que eles xa teñen tradición de concursos de petiscos e seguro que lles apetecerá vir a Toén a coñecernos. Todos os hostaleiros estádevos preparando o noso petisco con moito esmero para sorprender a clientes e amigos».
Os petiscos terán un prezo fixo de 2 euros e déixase completa liberdade aos cociñeiros en canto a materias primas e temática do seu prato. Os clientes poderán votar tras ter probado polo menos catro dos sete petiscos dispoñibles. O concurso desenvolverase os días 25 e 26 de xuño e o 2 e 3 de xullo, entre as 19.00 e as 22.30 horas. Participan: Café Bar O Pego, A Casa do Peso e Café Bar Venecia, en Moreiras; Bar A Illa, en Mugares; e o Restaurante Pazos e a Tabena Grancas, en Toén.