Os propietarios de leiras cédenas ao Banco de Terras para que se cultiven de novo
15 dic 2019 . Actualizado ás 05:00 h.A Xunta explicou aos veciños de Trelle (Toén) o proxecto para converter esta localidade nunha aldea modelo. O conselleiro de Medio Rural, José González, acompañado pola delegada da Xunta, Marisol Díaz Mouteira, e polo alcalde de Toén, Ricardo González (PP), acudiu este sábado ao pobo para explicar aos veciños en que consiste este proxecto da Consellería que busca reducir o risco de incendios forestais eliminando combustible coa limpeza das leiras que rodean os pobos e manténdoas limpas a través da produción agrícola-gandeira. No caso de Trelle, pódese conseguir unha superficie explotable de trinta hectáreas pois hai 649 parcelas, que pertencen a 179 propietarios.
O conselleiro defendeu que o proxecto busca a dinamización económica do interior rural creando unha barreira natural fronte aos lumes, como había fai unhas décadas cando a contorna dos pobos estaba limpo porque se cultivaba ou había aproveitamentos do monte. Nos últimos meses, a Consellería de Medio Rural recibiu 47 solicitudes de concellos con aldeas que poderían incluírse neste modelo. Seis xa están aprobadas e vinte, en trámite. Para que un pobo se inclúa neste proxecto, os propietarios dos terreos deben ceder as súas parcelas ao Banco de Terras que logo as pon a disposición de produtores para que as manteñan cultivadas e traballadas. A cambio, reciben un arrendamento e a Administración comprométese desde o primeiro momento en facerse cargo da limpeza das leiras, e do seu custo, tanto as incluídas na franxa de protección de 50 metros obrigatoria, como máis aló. O conselleiro visitará este mediodía, co mesmo propósito, a localidade de Xacebás , en Quintela de Leirado.