A iniciativa presentada no Congreso polo PP foi aprobada a pesar da abstención de PSOE e Unidas Podemos
11 may 2021 . Actualizado ás 05:00 h.A reivindicación dos empresarios do polígono industrial de San Cibrao das Viñas para a creación alí dunha estación ferroviaria de mercancías chegou onte ao Congreso dos Deputados. O PP levou unha proposición non de lei que insta o Goberno central a executar este proxecto e a iniciativa foi aprobada coa abstención dos partidos que sustentan ao Executivo: PSOE e Unidas Podemos. No mesmo sentido situouse ERC. O texto final, que os populares modificaron para chegar a un acordo con Cidadáns, insta o Goberno a que ADIF finalice a análise do anteproxecto da nova terminal de mercancías «para a continuación de forma inmediata iniciar polo Ministerio de Transportes, Mobilidade e Axenda Urbana a redacción do estudo de viabilidade económico-financeira que permita proceder á redacción do correspondente proxecto». Esta proposición recibiu o apoio tamén de Vox e de Foro Asturias mentres que os representantes dos grupos Vasco e Plural e de EH Bildu non estiveron presentes na votación.
O PSOE presentara unha emenda de modificación que simplificaba a proposta de acordo para quedar deste xeito: «O Congreso insta a que ADIF continúe coa análise do anteproxecto da terminal ferroviaria de mercancías de San Cibrao das Viñas que lle foi entregado». No debate celebrado no Congreso, en nome dos socialistas falou a ourensá UxíaTizón , que asegurou que o Goberno xa está a traballar para facer realidade este proxecto. Segundo dixo, «está no camiño, traballando no desenvolvemento e nun análise para a revisión do anteproxecto co obxectivo de acadar o mellor por e para Ourense». Ademais, lembrou que da estación de mercancías empezouse a falar no ano 2004, cando o agora presidente da Xunta era conselleiro de Política Territorial. «En que momento abandonou Feijoo o proxecto?», preguntouse Tizón.
O encargado de defender a iniciativa do PP foi Celso Delgado, que lamentou non ter podido conseguir un acordo unánime. Na súa intervención destacou a importancia que tería esta actuación para os empresarios do polígono pero tamén para a cidade polo espazo que se liberaría na estación Empalme. Tras a votación dixo temer que o Estado queira «endilgar» a obra á Xunta ou a Deputación.