A cooperativa do Ribeiro incorpora á terceira xeración
11 jun 2018 . Actualizado ás 05:00 h.O viñedo de San Cibrao da cooperativa Viña Costeira foi o lugar escollido para celebrar o cincuenta aniversario de márcao que é xa unha entidade do viño en Galicia.
O conselleiro delegado da cooperativa, Andrés Rodríguez Gómez, puxo en valor a traxectoria dos viticultores da comarca e lembrou que a historia de Viña Costeira comezou cunha reunión entre produtores nun cine. «Se nos trasladásemos ao ano 1968, momento no que a antiga cooperativa de Leiro e a cooperativa de Ribadavia se uniron, veríamos como toda a xente hipotecou o seu patrimonio e pasaron moitas penurias, sen cobrar durante varias colleitas», afirmou Rodríguez Gómez.
Viña Costeira cumpre medio centenario recibindo máis de 10.000 visitas ao ano e sendo un referente pola calidade na elaboración dos seus viños. «Hoxe temos novos retos e ilusións renovadas. Estamos na terceira xeración de socios que se está incorporando á cooperativa, tanto en postos de xestión como no viñedo, e temos que conseguir que os mozos se queden aquí. Ben sexa polo cariño que lle teñan ao viñedo e a terra ou ben sexa por facer rentables as explotacións», engadiu o conselleiro delegado.
Ao acto acudiron diversas personalidades da política galega como o alcalde de Ribadavia, Ignacio Gómez, que tamén interveu para felicitar aos cooperativistas polo camiño percorrido. «Quero recoñecer a visión innovadora aos promotores que souberon ver que traballando xuntos, unindo as colleitas das súas viñas, podían ofrecer un mellor produto. E que podían transformar e vender eles mesmos o produto conseguindo que o valor engadido repercutise nas súas economías», destacou o rexedor durante o acto.
O artista ourensán Acisclo Manzano elaborou tres esculturas, en homenaxe aos viticultores, con motivo do cincuentenario que desde onte deixarán constancia no viñedo da historia da cooperativa e os seus traballadores.
Por outra banda, o presidente da Xunta, Alberto Núñez Feijóo, que tamén asistiu ao acto, destacou que o viño é un dos símbolos de identidade galegos e que a chegada do AVE en 2019 xogará un papel fundamental para dar a coñecer os caldos galegos.
«No mundo no que camiñamos hoxe, lamentablemente hai moito individualismo. Sen embargo, o mundo do viño é o contrario. A xente reúnese para tomarse un viño e conversar ou compartir bos momentos», afirmou na súa quenda de palabra. «O viño forma parte do patrimonio inmaterial de Galicia e é sinónimo de Galicia Calidade. Cando alguén pide un Ribeiro, está visionando Galicia», afirmou.