O Concello de Parada de Sil quere pór en marcha un autobús lanzadeira entre o centro urbano e o edificio
08 sep 2020 . Actualizado ás 05:00 h.Ao redor de 11.000 persoas pasaron polo Mosteiro de Santa Cristina, en Parada de Sil, durante o mes de agosto. Son os cálculos do goberno local sumando os 8.177 visitantes que acudiron a visitar o edificio no horario de apertura, ao que suman un 25 % máis fóra desas horas, que acabarían vendo o exterior. O pico estivo na fin de semana do 15 e o 16, con 842 turistas que pagaron por ver o interior. «Todos os días en horario de oficina se dispuxo de gel para os visitantes, e se controlou o acceso de xeito que nunca houbese un número excesivo de visitantes dentro do mosteiro», apunta o alcalde, Aquilino Domínguez.
Ante estes datos, o rexedor considera unha necesidade a posta en marcha dun autobús lanzadeira desde o centro urbano ata o mosteiro. Desta forma reducirase a contaminación e evitaranse os atascos e a sobresaturación de coches no aparcadoiro, cuxa capacidade resulta insuficiente.