A asociación que organiza o Pobo Pantasma representará escenas de medo polo centro histórico da cidade
23 oct 2021 . Actualizado ás 05:00 h.Na aldea de Chaioso , en Maceda , viven pouco máis de cinco veciños. Pero son moitas máis persoas as que seguen vinculadas a esa terra. Por iso no 2005 decidiron xuntarse e pór en marcha a Asociación Cultural de Veciños de Chaioso, da que forman parte máis de medio centenar. Entre todas as citas que organizan no seu pobo, a que máis adeptos ten é o Pobo Pantasma. Unha celebración que ten lugar no verán e que converte ao pobo nunha auténtica casa do terror. Comezaron organizándoo só no pazo, pero aos poucos a cousa foi trasladándose a todos os recunchos do pobo. E é que nesta cita xa participan cada ano máis de 120 voluntarios. Disfrazados, caracterizados completamente e organizados por zonas, os personaxes encárganse de asustar aos visitantes, que pasean por Chaioso en pequenos grupos de dez persoas. Nese día o pobo recibe a xente que chega de todas partes de Galicia, disposta a gozar co medo e os pelos de punta.
A idea, que poñen en marcha desde fai quince anos, convenceu o Concello de Ourense e este ano o equipo do Pobo Pantasma vaise encargar de salpicar o seu horror por todo o centro histórico da capital ourensá. Será a forma de celebrar Halloween na capital, o domingo 31, entre as 23.00 horas e as tres da madrugada. «Haberá dez escenificacións diferentes e estáticas, nas que participaremos un total de 116 persoas disfrazadas», explica José Manuel Garrido, un dos xefes da asociación de veciños que se encarga da organización. É dicir, a xente poderá gozar dunha noite de petiscos pola zona de viños, ao mesmo tempo que se irá atopando con distintas escenas de terror. Estará a nena do exorcista e un grupo de curas intentando quitarlle ao diaño; pero tamén haberá un carniceiro tolo que descortiza a nenos. O medo este Samaín está asegurado en Ourense, pero sempre baixo un halo de diversión. «A nosa motivación é pasalo ben», apunta José Juan Pérez, outro membro da asociación. «Para nós é moi especial porque levamos dous agostos sen poder celebrar o Pobo Pantasma de Chaioso por culpa do covid, así que estamos a desexar volver disfrazarnos e a gozar do terror», remata Roberto Cid. Farano coidando cada detalle, con maquilladores profesionais e efectos especiais. Só queda apuntar a cita e... ¡a morrerse de medo!