O chef Javier Oleiros gozou do menú degustación do local ourensán xunto á súa muller, Amaranta Rodríguez, e aos seus dous fillos
14 oct 2021 . Actualizado ás 16:07 h.Os martes o restaurante Culler de Pau, no Grove, pecha por descanso do persoal. Aproveitando o día e coincidindo co festivo do Pilar , a familia que está detrás do dúas estrelas Michelin galego decidiu achegarse a Ourense . O chef Javier Oleiros e a súa muller, a xefa de sala de Culler, Amaranta Rodríguez, visitaron xunto aos seus dous pequenos o restaurante Ceibe, situado na cidade das Burgas. Alí gozaron dun menú degustación elaborado por os cociñeiros Lydia del Olmo e Xosé Magalhaes. «Temos moi boa relación con eles e para nós foi unha ilusión moi grande recibilos na nosa casa», explica Xosé. De feito Lydia estivo un tempo traballando en Culler de Pau. «A verdade é que desfrutamos moitísimo. Comemos Galicia a bocados», di Amaranta, describindo así a súa primeira experiencia en Ceibe.
«Foi un reencontro entre amigos. Javi e Amaranta animáronnos e axudáronnos dende que comezamos co noso proxecto e para nós é sempre unha alegría velos», di Xosé. E ese apoio seguen téndoo hoxe en día. «Estamos alucinados con eles. O seu proxecto ten só un ano, que estivo precisamente plagado de dificultades e restriccións, e aínda así fan unha proposta moi boa e moi forte», remata Amaranta, que xa sabe que repetirán seguro.