En Ourense, a curva sitúase en 2.285 casos activos de coronavirus tras detectarse novas 179 infeccións
OURENSE CIDADE
Reabre a planta covid do Hospital Comarcal de Valdeorras cun paciente ingresado
22 jul 2021 . Actualizado ás 12:20 h.Desde que comezou o mes, a curva non deixou de crecer. E segue sumando positivos. No balance do xoves 22 de xullo aparecen 179 novos casos activos de coronavirus , que elevan a cifra global a 2.285 . Nas últimas horas, 75 persoas recibiron a alta. Crece tamén o ritmo de xente que se dá por curada, ao cumprirse os 10 días do seu positivo. Aínda así, as novas infeccións detectadas a diario supoñen aínda un número máis elevado, provocando que a curva siga marcando subida.
No que afecta os concellos, Ourense e O Barco de Valdeorras seguen rompendo o seu teito de casos activos un día máis. Teñen 1.244 e 186 veciños infectados, respectivamente, o que supón as cifras máis altas de toda a pandemia. Barbadás chega a 107, e iguala o seu máximo histórico, que marcou o 3 de febreiro. Tamén segue sumando positivos O Carballiño, con 116 casos activos. O Pereiro de Aguiar e Xinzo de Limia teñen 37 casos, Allariz mantense con 35, Verín sobe a 33, Avión a 32 e San Cibrao das Viñas a 26. Celanova continúa con 25 e Ribadavia baixa a 24. Maceda sobe dous e ponse en 21, mentres que Boborás sobe a 20, Coles a 18 e Vilamartín de Valdeorras a 15. No resto de concellos hai 14 ou menos casos activos; e 8 están libres do virus.
A maioría dos enfermos están en illamento domiciliario, aínda que hai 39 persoas que precisan ingreso hospitalario. Son 5 menos que onte, aínda que hai cambios na distribución. Hai 35 pacientes en planta no CHUO, 1 no Hospital Comarcal de Verín , 1 en Cosaga e 1 no Hospital Comarcal de Valdeorras, que tivo que reabrir a planta covid, que estaba baleira desde o 12 de xuño.
Cribado en Vilamartín de Valdeorras
Seguindo a política de procura de casos asintomáticos, o Sergas convocou un cribado en Vilamartín de Valdeorras. Desde hoxe e durante varios días, hai 124 veciños de entre 18 e 38 anos citados no Autocov do Hospital Comarcal de Valdeorras para facerse unha PCR que descarte ou confirme un positivo en coronavirus .