Un ourensán preside a Asociación Galega de Deportes Electrónicos
19 abr 2021 . Actualizado ás 05:00 h.O Auditorio Municipal dispón dun local baleiro e a Asociación Galega de Deportes Electrónicos solicitou ao Concello a súa cesión para crear un museo do videoxogo. A entidade ofrecíase a pór en marcha e xestionar o servizo a custo cero para o Concello. Ese proxecto «axudaría a poñer Ourense no mapa», di o seu presidente, Millán Brea Castro, que lamenta que o goberno municipal non fose receptivo a esta idea.
Sería un espazo con pantallas e consolas, con torneos todas as fins de semana. «Atraería a xente de todo o norte de España porque non existe nada parecido», explica o ourensán, que lembra que hoxe en día os videoxogos son a principal industria do entretemento. «Máis de quince millóns de españois xogan», resume Millán Brea, que denuncia a «criminalización» que sofre esta actividade por parte dalgúns: «É unha crítica cíclica á mocidade. Todo o que vén do movemento xuvenil sempre é criticado. E eu son defensor da mocidade porque todo o mundo pasa por aí, pero cando cumprimos unha certa idade parece que nos esquecemos de que eramos subversivos e nos gustaba facer cousas que a xente maior non comprendía».
Dos deportes electrónicos (ou esports) dise que poden xerar adicción «igual que o consumo de alcol ou de tabaco», di Brea Castro, que engade que «todo require dunhas certas pautas». Recoñece, neste sentido, que o confinamento pola pandemia non axudou porque «pasamos tres meses en casa seguidos e iso axuda a quitarse de outro tipo de vicios pero non dese». Cre, no entanto, que se trata dunha actividade que pode ser moi positiva se se aborda de xeito adecuado: «Forman parte do desenvolvemento integral da persoa porque, ao final, os esports permiten relacionarte con xente de moitos sitios, pero ten que haber unhas normas fundamentais e, se non as hai, pode xerarse adicción».
Profesor asociado no campus de Ourense, un dos seus alumnos está a preparar con el un traballo de fin de grao que analiza, precisamente, o papel que os educadores sociais poderían xogar neste ámbito. «Agora falase moito das casas gaming, con Ibai como referente. Vive nunha casa con varias persoas e esa figura podería estar aí dentro traballando en temas de estudos, horarios, hábitos saudables, etcétera», explica Millán Brea, que tamén está interesado polo modo en que os xogadores se preparan: «Eu era adestrador de baloncesto e preocúpame moito a metodoloxía, como os adestradores de esports traballan cos rapaces». Ao contrario do que ocorre cos deportes federados, neste caso non existe ningún tipo de acreditación oficial ou requirimento para dedicarse a iso. «Os esports moven xa millóns de cartos e millóns de xogadores e igual hai unha profesión de futuro aí», suxire.
El empezou de neno xogando cunha Gameboy e agora é coleccionista de consolas e presidente a Asociación Galega de Deportes Electrónicos. «O que buscamos é que os xogadores non sexan demonizados», di Millán Brea, que remarca que un dos obxectivos principais da entidade é a igualdade. «Non nos vale que os videoxogos sexan todo de homes. Queremos que as chicas xoguen e que aparezan tamén nos videoxogos», detalla o ourensán.
Orgulloso dos proxectos dos seus alumnos: radio, horta e melloras de accesibilidade
Millán Brea foi nomeado o ano pasado para recibir o premio ao Mellor Docente de España. El réstalle importancia pero destaca que «o bo é que é algo que saíu do alumnado». Está moi orgulloso dos seus alumnos da materia de Pedagoxía Social, na que aplica a modalidade de docencia de aprendizaxe e servizo. «Trátase de aprender facendo cousas», explica Brea Castro, que precisa que os estudantes puxeron en marcha unha horta, unha radio e un proxecto para a mellora da accesibilidade da facultade: «Todo feito polo alumnado. Eu simplemente estou alí coordinando e animando».
É un firme defensor da importancia que poderían ter os educadores sociais nunha sociedade como a nosa e lamenta que «aínda hai xente que non a recoñeza como profesión». Pon o exemplo do debate actual ao redor da cultura en Ourense: «Crear redes culturais é unha das funcións das educadoras sociais. Se ti apostas pola cultura de barrio dinamizada por elas, pode saír incluso máis barato que traer a Jennifer López, como prometeu Jácome».
DNI
Quen é?
Millán Brea Castro. Naceu en Ourense en 1981.
Que fai?
Educador social. Traballa como educador social no centro Quérote + da Casa dá Xuventude. Doutor en Ciencias da Educación e sexólogo, ademais é profesor asociado en Universidade de Vigo. Preside a Asociación Galega de Deportes Electrónicos.