A curva segue crecendo na área sanitaria, onde hai 764 casos activos
07 ene 2021 . Actualizado ás 12:06 h.A área sanitaria de Ourense, Verín e Valdeorras suma hoxe 80 novos positivos, elevando a 9.007 a cifra de ourensáns que se contaxiaron desde o inicio da pandemia no mes de marzo. Neste tempo hanse curado 7.931 persoas (as últimas 50 recibiron a alta o Día de Reis), mentres que 312 faleceron ao non poder superar a enfermidade. Isto deixa en 764 os casos activos. A maioría dos pacientes con covid están en illamento domiciliario, sendo asintomáticos ou con síntomas leves; pero segue medrando a cifra dos que precisas hospitalización (dúas máis que no último balance). Hoxe son 32 as persoas ingresadas en planta covid: 27 no CHUO, 4 no hospital comarcal de Verín e 1 no Carmen. Ademais, hai 2 pacientes en coidados intensivos.
Soben os casos activos en todo a área sanitaria, e destaca a situación de varios concellos, que tamén mostran unha curva en ascenso. É o caso da cidade de Ourense, que xa ten 214 veciños infectados; ou Barbadás, con 36 casos. Tampouco consegue dobregar a curva Xinzo de Limia, a pesar das medidas de restrición impostas desde o pasado día 30. Hoxe son 79 os casos activos.
Boa tendencia en Verín, A Rúa e Sarreaus
Aínda é pronto para botar as campás ao voo, pero na comarca de Verín suman dous días de baixada de casos activos. En Verín hai 84 pacientes con covid, dez menos que o martes; mentres que en Monterrei baixan a 21 (a véspera de Reyes eran 23) e en Castrelo do Val quedan tres pacientes pendentes de negativizar (o día 1 había 7).
E aínda mellor é a evolución da Rúa de Valdeorras e Sarreaus, en peche perimeral e a hostalería aberta só ata as seis da tarde desde o pasado 12 de decembro. Na Rúa son 6 os casos activos, e 5 en Sarreaus; o que achega a ambas as localidades ao fin das restricións máis duras.