A Academia Médico Cirúrxica de Ourense abordou na súa segunda sesión ordinaria os desafíos expostos polo covid-19 nesta pandemia
20 novs 2020 . Actualizado ás 14:27 h.As leccións aprendidas co covid-19 e os desafíos de futuro que expón esta enfermidade centraron a sesión científica da Academia Médico Cirúrxica de Ourense, que se celebrou mediante unha conferencia online e na que participaron catro facultativos tiveron contacto con pacientes e profesionais durante as dúas ondas da pandemia. Raimundo Gulín, médico de familia do centro de saúde Valle-Inclán de Ourense, apuntou que as leccións que deixa a pandemia é que a atención primaria, reforzada, debería ser o eixo da atención e recomendou que nos centros de saúde haxa sistemas de acollida de pacientes por triajes e axendas flexibles. Entre os desafíos, mencionou que hai que evitar o desgaste dos profesionais e «reducir a burocracia que non achega valor».
Pilar Garzón, médica de urxencias, contou como viviron no servizo as dúas ondas. Viron os primeiros pacientes con clínica compatible con covid-19 o 25 de febreiro cando aínda non coñecían os protocolos. Na súa opinión, durante a primeira onda agravouse o problema dun «servizo abocado ao fracaso estrutural por falta de espazo». Cre que esta segunda onda se afronta con máis material e experiencia, pero sen ter liquidado esas deficiencias en urxencias. Apuntou que a maioría dos pacientes chegaron alí por «iniciativa propia» e menos foron os casos derivados desde primaria ou da atención telemática por Telea. Neste sentido, os profesionais mencionaron que os centros de seguimento ou de rastreo dos positivos tardan en contactar cos pacientes e que isto xera confusión.
A internista María Bustillo indicou que a telemedicina, coa aplicación Telea, foi unha ferramenta útil para tratar a pacientes illados pero matizou que «a parte humana é imprescindible» e que require moito persoal. Pola súa banda, Álvaro de Castro falou das experiencias en Baños de Molgas e Piñor. Avogou por modelos de residencias de anciáns sostibles, e apuntou que sería importante que tivesen osíxeno nos cuartos e máis formación para os coidadores.