Os arquitectos ven «irrisorios» os cambios introducidos pola Xunta na intermodal
OURENSE CIDADE
Defenden que a súa oposición ao proxecto vén de lonxe
11 ene 2020 . Actualizado ás 05:00 h.O proxecto da estación intermodal de Ourense segue xerando un intenso debate. Á concentración cidadá do pasado martes para esixir a recuperación do proxecto de Foster do 2011 e censurar a estación de autobuses executada pola Xunta respondeu a administración autonómica cun comunicado no que se cuestionaba que os arquitectos participasen nas protestas, tendo en conta que aseguraban participaran na Comisión de Urbanismo de Galicia que lle deu luz verde e que, ademais, tivéronse en conta as súas propostas para mellorar a actuación.
Desde a delegación de Ourense do COAG insisten en que a proposta presentada era «abusiva, constreñida e invasora» na zona. A total oposición á actuación, aseguran, traduciuse en alegacións que non se viron colmadas con esas variacións introducidas pola Xunta. «Os cambios foron irrisorios», indican, á vez que iso provocou novas alegacións.
Na resposta oficial, desde o colexio de arquitectos advirten de que seguirán «traballando» para lograr unha estación «adecuada» para Ourense. Sobre o proxecto en marcha da estación de autobuses, desde o COAG indican que «lonxe de achegar unha solución congruente, contribúe a confundir as achegas de todas as épocas».